Vatikan Bosniya və Herseqovinaya Aİ üzvlüyünə namizəd ölkə statusunun verilməsini alqışlayır
Vatikan, 4 aprel, AZƏRTAC
Müqəddəs Taxt-Tac Bosniya və Herseqovinaya Avropa İttifaqına (Aİ) üzv olmaq üçün namizəd ölkə statusunun verilməsini alqışlayır.
AZƏRTAC xəbər verir ki, bu fikirlər Roma Katolik Kilsəsinin rəhbəri Papa Fransiskin Vatikanda Bosniya və Herseqovina Nazirlər Şurasının sədri Boryana Kristo ilə görüşündə səsləndirilib.
Tərəflər Vatikan-Bosniya və Herseqovina əlaqələri, Bosniya və Herseqovinadakı katoliklərin vəziyyəti və kilsə ilə dövlət arasında münasibətlərə dair müzakirələr aparıblar. Həmçinin Bosniya və Herseqovinanın ümumi mənafeyi naminə bütün siyasi aktorlar arasında inklüziv dialoqun vacibliyi vurğulanıb, Avropa İttifaqının genişlənmə siyasəti ilə bağlı məsələlər müzakirə olunub.
Görüşdə Müqəddəs Taxt-Tacın dövlət katibi kardinal Pietro Parolin və Vatikanın Xarici Dövlətlərlə Əlaqələr üzrə katibi Paul Riçard Qallaher də iştirak ediblər.
Nihad Budaqov
AZƏRTAC-ın xüsusi müxbiri
Vatikan
Bölmənin digər xəbərləri
