Vəkillərin icbari təlimlərinin ikinci istiqaməti yekunlaşıb
Bakı, 26 avqust, AZƏRTAC
Cari ilin avqust ayı ərzində vəkillərin peşə hazırlığı, eləcə də ixtisaslarının artırılması üzrə nəzərdə tutulmuş ikinci istiqamət üzrə Vəkillər Kollegiyasının (VK) Tədris Mərkəzi və Ədliyyə Nazirliyinin Ədliyyə Akademiyasının birgə təşkilatçılığı ilə müxtəlif icbari tədris tədbirləri təşkil olunub.
Bu barədə AZƏRTAC-a VK-dan məlumat verilib.
Bildirilib ki, avqustun 1-də “Vergi mübahisələri” mövzusunda təşkil olunmuş hibrid formalı təlimdə VK-nın üzvü Könül Bədəlova tərəfindən vergi mübahisələri və mübahisə növləri, mübahisələndirmə haqqında iddia qaldırılarkən nəzərə alınmalı məsələlər, müvəqqəti xarakterli müdafiə institutunun tətbiqi üzrə yeni məhkəmə təcrübəsi, vergi orqanının qərarının icrasının dayandırılmasının hüquqi nəticələri, kameral vergi yoxlamaları üzrə aktual mübahisələr və məhkəmə təcrübəsi və praktiki tövsiyələr barədə müxtəlif müzakirələr aparılıb.
Həmin gün keçirilən növbəti hibrid təlimdə isə “Cinayət işlərində müdafiə taktikasının qurulması: Nəzəri və praktiki yanaşmalar” mövzusu üzrə təlimçi – VK-nın üzvü Samir İsayev cinayət işlərində müdafiə taktikasının anlayışı və əsas xüsusiyyətləri, müdafiə strategiyası və müdafiə taktikası anlayışlarının fərqləri, cinayət işinin ilkin təhlili və sübut xəritəsinin qurulması, tutulma və həbs mərhələsində müdafiə taktikası, axtarış, götürmə və digər istintaq hərəkətləri zamanı müdafiə, Cinayət-Prosessual Məcəlləsinin müdafiə imkanları: vəsatətlər, etirazlar və şikayətlər, ekspertiza və elektron sübutlarla iş, məhkəmə mərhələsində müdafiə taktikası barədə məruzə ilə çıxış edib.
Bundan başqa, avqustun 8-də “İnzibati işlər üzrə ümumi problemlər” mövzusunda təşkil olunmuş distant formalı təlimdə təlimçi – VK-nın üzvü Vəfadar Piriyev inzibati mübahisələrin hüquqi mahiyyəti, inzibati icraatın və inzibati məhkəmə icraatının normativ əsasları, İnzibati Prosessual Məcəllənin tətbiqində aktual məsələlər, o cümlədən praktikada rast gəlinən əsas problemlər barədə ətraflı çıxış edib.
Eyni gündə keçirilən növbəti distant təlimdə isə “Elektron sübutlar və rəqəmsal məlumatlarla sübutetmə, məlumatların qorunması” mövzusu üzrə təlimçi – VK-nın üzvü, “Kibercinayətkarlıq” Komitəsinin sədri, hüquq üzrə fəlsəfə doktoru Asif Mustafayev elektron məlumatların növləri, elektron sübutların əldə edilməsi və Cinayət-Prosessual Məcəlləsinin tələbləri, elektron sübutların autentikliyi və bütövlüyü, elektron daşıyıcıların ekspertizası, bulud sistemlərindən məlumatların əldə olunması, eləcə də şəxsi məlumatların qorunması və konstitusiya təminatları barədə məruzə ilə çıxış edib.
Bundan əlavə, avqustun 15-də “Süni intellektin hüquqa təsiri və hüquqi risklər” mövzusunda təşkil olunmuş distant formalı təlimdə VK-nın üzvü Nurlan Səfərov süni intellekt texnologiyalarının hüquq sahəsinə təsiri və tətbiq imkanları, hüquqi fəaliyyətdə generativ süni intellekt alətlərindən istifadə, süni intellekt tərəfindən yaradılan məlumatların dəqiqliyi və digər əlaqəli məsələlər barədə müxtəlif müzakirələr aparıb.
Həmin gün keçirilən növbəti hibrid təlimdə isə “Aktual vergi mübahisələri və məhkəmə təcrübəsi” mövzusu üzrə təlimçi – VK-nın və kollegiyanın Biznes Hüququ Komitəsinin İdarə Heyətinin üzvü Sirac Piriyev vergi mübahisələrinin növləri, müvəqqəti xarakterli müdafiə institutunun tətbiqi üzrə yeni məhkəmə təcrübəsi, vergi orqanının qərarının icrasının dayandırılmasının hüquqi nəticələri, ümidsiz vergi borclarının silinməsi üzrə məhkəmə təcrübəsi və digər praktiki məsələlər barədə geniş məruzə ilə çıxış edib.
Avqustun 22-də “Qeyri-kommersiya qurumlarının dövlət qeydiyyatı və sonrakı fəaliyyəti ilə bağlı hüquqi məsələlərdə vəkillərin rolu” mövzusunda təşkil olunmuş distant formalı təlimdə VK-nın üzvü Aytən Abbasova qeyri-kommersiya hüquqi şəxslərin dövlət qeydiyyatı ilə bağlı hüquqi yardımın mahiyyəti və əsas xüsusiyyətləri, ayrı-ayrı qeyri-kommersiya qurumlarının dövlət qeydiyyatının xüsusiyyətləri, xarici qeyri-hökumət təşkilatlarının filial və nümayəndəliklərinin dövlət qeydiyyatı və digər mövcud praktiki məsələlər barədə müxtəlif müzakirələr aparıb.
Eyni gündə təşkil edilən “Cinayət işlərində müdafiə taktikasının qurulması: Nəzəri və praktiki yanaşmalar” mövzusu üzrə təlimçi – VK-nın üzvü, Sumqayıt Regional Vəkil Bürosunun müdiri Anar Qasımlı müdafiə strategiyası və müdafiə taktikası anlayışlarının fərqləri, cinayət işinin ilkin təhlili və sübut xəritəsinin qurulması, tutulma və həbs mərhələsində müdafiə taktikası, məhkəmə mərhələsində müdafiə taktikası, o cümlədən praktikada rast gəlinən əsas problemlər barədə ətraflı çıxış edib.
Qeyd olunan təlimlərdə 3083 vəkil (1 vəkil bir neçə təlimdə iştirak etməklə) iştirak edib.
Bununla da, kollegiya üzvlərinin yanvarın 31-də keçirilmiş ümumi yığıncağında qəbul edilmiş və vəkillər üçün peşə hazırlığı, eləcə də ixtisaslarının artırılması üzrə nəzərdə tutulmuş ikinci istiqamət üzrə 3 saat icbari tədris tədbirlərinə yekun vurulub.
Qeyd edək ki, avqustun 29-dan etibarən tədris tədbirlərinin birinci istiqaməti üzrə vəkillərin etik davranış qaydaları və ümumiləşdirilmiş məhkəmə təcrübəsinə həsr olunmuş təlimlərə başlanılacaq.
Bölmənin digər xəbərləri
