Venesiya ənənəvi şəhər peşəsi üçün vakansiyaları doldurmağa çalışır
Bakı, 16 avqust, AZƏRTAC
İtaliyanın tarixi Venesiya şəhərində ənənəvi peşə sahibləri - qondolyerlər (“qondola” adlanan qayıqları idarə edən şəxs –red.) çatışmır.
AZƏRTAC xarici mediaya istinadla xəbər verir ki, şəhər rəhbərliyi namizədləri qayıqlara nəzarət, dil dərsləri və nəzəri məşğələlərdən ibarət intensiv hazırlıq kursuna dəvət edir. Namizədlər 18 yaş və yuxarı, orta təhsilli, üzgüçülük bacarığı olan, sağlam və güclü bədən quruluşuna malik şəxslər olmalı, bütün bunları təsdiq edən tibbi arayış təqdim etməlidirlər.
Həsir papaqları və zolaqlı köynəkləri olan Venesiya qondolyerləri əsrlər boyu şəhərin dar kanalları vasitəsilə sərnişinləri məharətlə daşıyıblar. Qədim peşə ənənələrinin davam etməsini təmin etmək üçün indi onların sayını artırmağa çalışırlar.
Bununla belə, müraciət prosesi heç də asan deyil. Birincisi, qondolyer olmaq istəyənlər “Arte del Gondoliere” adlanan təlim kursu üçün müraciət etməlidirlər. Onlar yalnız avarçəkmə qabiliyyətini sübut etdikdə və ya ən azı bu bacarığı inkişaf etdirmək üçün lazım olan keyfiyyətlərə malik olması əlamətlərini göstərdikdə peşəyə uyğun olacaqlar.
Qondolyer peşəsi 1094-cü ildən bəri Venesiyanın rəmzi sayılır. Əsrlər boyu 11 metr uzunluğundakı qayıqlar şəhərdə cəmiyyətin aşağı təbəqələrini daşıyan əsas nəqliyyat növü idi. Həmin dövrdə aristokratların sevimli nəqliyyat növü olan atların dar küçələrdə hərəkətinə qadağa qoyulmuşdu. XIV əsrdən XVI əsrə qədər Venesiya ətrafında təxminən 10 min qondola üzürdü.
Bu gün şəhərdə yalnız 433 qondolyer var. Əvvəllər bu peşə yalnız kişilərə məxsus idi və müvafiq lisenziyalar adətən atadan oğula ötürülürdü. Amma indi istənilən Avropa İttifaqı ölkəsinin vətəndaşı qondolyer ola bilər. Corcia Boskolo 2009-cu ildə ilk qadın qondolyer olub və bu gün zərif cinsin qondola idarə edən nümayəndələrinin sayı 14-ə çatıb.
Hər il təxminən 30 milyon insan Venesiyaya səfər edir və bu səbəbdən qondolyerlərə böyük tələbat var. Amma onlar bu gün tez-tez su taksilərinə və sürətli qayıqlara etiraz edir, kanalda ehtiyatsız idarəetmənin daha kiçik gəmiləri aşıran dalğalar yaratdığını, bununla da həyatlarının risk altında olduğunu bildirirlər.
Bölmənin digər xəbərləri
