VENESUELA ÇİNƏ GÜNDƏ 500 MİN BARREL NEFT İXRAC EDƏCƏKDİR
Venesuela lideri dövlət telekanalında çıxış edərək demişdir: “Neft məsələsi böyük əhəmiyyətə malikdir, çünki biz öz yanacaq biznesimizi hərtərəfli inkişaf etdiririk, bu isə strateji alyans yaratmaqda daha bir addımdır”.
Teleyayım H.Çavesin rəsmi səfərdə olduğu Çindən aparılırdı. O, Pekində Çinin ali rəhbərliyi ilə, o cümlədən ÇXR sədri Xu Szintao ilə görüşməyi planlaşdırır. Səfər zamanı Çinin birgə layihələrə sərmayə yatırımını artırması haqqında ikitərəfli sazişlər imzalanacağı gözlənilir.
Xatırladaq ki, bu yaxınlarda Huqo Çaves ilkin alüminium ixracını azaldacağını, yerli və əcnəbi şirkətlərin alüminium məmulatı hazırlayan zavodları Venesuela ərazisində yaratmalarına kömək göstərəcəyini vəd etmişdi. H.Çaves Venesuelanın əsas ticarət tərəfdaşı olan ABŞ-dan ölkəsinin asılılığını azaltmaq üçün digər dövlətlərlə əlaqələri genişləndirir.
Bunun üçün Venesuela Macarıstanın “Ples Rt” şirkəti ilə birlikdə avtomobil mühərrikləri bloklarının tökülməsi üçün alüminium istehsalı zavodu tikməyi planlaşdırır. Tikintiyə ilkin sərmayə yatırımı 222,3 milyon dollar olacaqdır. Müəssisənin səhmlərinin 70 faizinə “Ples Rt” şirkəti, 30 faizinə isə Venesuela höküməti nəzarət edəcəkdir.
Bölmənin digər xəbərləri
