İQTİSADİYYAT
Vergi inzibatçılığı sahəsində cari ildə 54 tədbirin həyata keçirilməsi planlaşdırılır
Bakı, 2 mart, AZƏRTAC
Sahibkarlıq fəaliyyəti dövründə vergitutma ilə bağlı qaydaların və inzibatçılığın mövcudluğu, düzgün və yerində işləməsi biznesin fəaliyyəti üçün vacib komponentlərdən biridir. Bu sahədə cari ildə 54 tədbirin həyata keçirilməsi planlaşdırılır.
AZƏRTAC Dövlət Vergi Xidmətinə istinadla xəbər verir ki, bu barədə İqtisadiyyat Nazirliyi yanında Dövlət Vergi Xidmətinin (DVX) rəis müavini Samirə Musayeva bildirib.
Onun sözlərinə görə, həm vergi qanunvericiliyinin, həm də vergi inzibatçılığının keyfiyyətinin və əlçatanlığının artırılması, bütövlükdə vergi yükünün və vergi səmərəliliyinin ölçülməsi istiqamətində işlər görülüb. Əlverişli biznes layihəsində göstərilən meyarlar üzrə ilkin qiymətləndirmələr aparılıb.
DVX rəsmisi deyib ki, biznes qaydaları sadə və sabit olmalı, birmənalı şərh edilməlidir. Qaydalar hazırlanarkən sahibkarların bununla bağlı fikirləri, təşəbbüsləri və təklifləri nəzərə alınmalıdır. Bu səbəbdən biznes mühiti üzrə rəy və münasibət əldə etməyə imkan verən sorğuların keçirilməsi ilə bağlı müfəssəl qaydalar hazırlanıb, “Sorğular və təkliflər” adlı elektron xidmət istifadəyə verilib.