“VESTİ KAVKAZA” SAYTI İSTİFADƏYƏ VERİLMİŞDİR
Moskva, 22 yanvar (AZƏRTAC). Yanvarın 19-da “Vesti Kavkaza” informasiya-analitik portalı istifadəyə verilmişdir. Qafqaz regionundakı vəziyyəti əks etdirəcək bu saytın fərqləndirici xüsusiyyəti elmi əsaslar üzərində sistemli təhlil aparılmasından ibarət olacaqdır.
“Vesti Kavkaza” saytında tarix, iqtisadiyyat, sosiologiya və hüquq sahəsində aparıcı moskvalı politoloq və ekspertlər çıxış edəcəklər. Saytın rəhbəri, Moskva Dövlət Universitetinin tarix fakültəsinin dekan müavini Aleksey Vlasovun sözlərinə görə, layihədə MDU-nun və Rusiya Dövlət Humanitar Universitetinin (RDHU) aparıcı mütəxəssisləri iştirak edəcəklər, çünki məhz həmin ali məktəblərdə qafqazşünaslıq məktəbləri yaradılmışdır, Qafqaz regionu ilə bağlı araşdırmalar aparılır. Bundan əlavə, portalın işində təkcə Rusiyadan deyil, Cənubi Qafqaz regionu ölkələrindən olan tərəfdaşlar, habelə peşəkar jurnalistlər iştirak edəcəklər.
Qeyd etmək lazımdır ki, “Vesti Kavkaza” informasiya-analitik saytı MDU-nun tarix fakültəsi və RDHU-nun mütəxəssisləri tərəfindən yaradılmışdır. Saytın redaksiya şurasının rəhbəri, tarix elmləri doktoru, Rusiya Elmlər Akademiyasının müxbir üzvü, RDHU-nun rektoru Yefim Pivovardır. Saytın rəhbərlərindən biri də Moskva Dövlət Universitetinin dosenti, RDHU-nun postsovet ölkələri kafedrasının müəllimi İsmayıl Ağakişiyevdir. Saytın ünvanı: www.vestikavkaza.ru.
Asya Hacızadə
AZƏRTAC-ın xüsusi müxbiri
Moskva
Bölmənin digər xəbərləri
