Kreml Ukraynada atəşkəsin şərtini açıqlayıb
Moskva, 13 may, AZƏRTAC
Ukraynada atəşkəsin elan olunması və tamformatlı sülh danışıqlarına keçid yalnız Ukrayna qoşunlarının Donbas ərazisindən çıxarılmasından sonra mümkündür.
AZƏRTAC xəbər verir ki, bunu Rusiya Prezidentinin mətbuat katibi Dmitri Peskov jurnalistlərin Moskvanın fikrincə Kiyevin münaqişənin başa çatması üçün atmalı olduğu addımlarla bağlı sualını cavablandırarkən bildirib.
Kreml nümayəndəsinin sözlərinə görə, Rusiya Prezidenti Vladimir Putin bu mövqeni hələ 2024-cü ilin iyununda Rusiya Xarici İşlər Nazirliyinin rəhbər heyəti qarşısında çıxışı zamanı səsləndirib. Dmitri Peskov qeyd edib ki, atəşkəsə nail olmaq üçün Ukrayna Prezidenti Volodimir Zelenski Ukrayna Silahlı Qüvvələrinə döyüş əməliyyatlarını dayandırmaq, Donbas ərazisini və “Rusiyanın regionlarını” tərk etmək barədə əmr verməlidir.
“Həmin an atəşkəs qüvvəyə minəcək və tərəflər sakit şəkildə danışıqlarla məşğul ola biləcəklər”, – deyə Peskov bildirib.
O əlavə edib ki, gələcək danışıqlar “çox mürəkkəb” olacaq və çoxsaylı mühüm detalların müzakirəsini tələb edəcək.
Bölmənin digər xəbərləri
