“Vışeqrad dördlüyü”nün paytaxtları biznes fəaliyyəti üçün ideal şəhərlərdir
Budapeşt, 7 sentyabr, AZƏRTAC
Budapeşt biznes fəaliyyəti üçün dünyada ən münasib şəhərdir.
AZƏRTAC xəbər verir ki, bir qrup ekspert bu günlərdə çoxsaylı amilləri araşdıraraq bu qənaətə gəlib. Tədqiq edilmiş indikatorlar arasında korporativ vergi dərəcəsinin aşağı olması və internet üçün aylıq xərclərin az olması müəyyənedici amillər sayılır.
Ekspertlər dünyanın 70 şəhərini orta əməkhaqqı, ofisin hər kvadratmetrinin orta dəyəri, bir kilovat elektrik enerjisinin qiyməti, aylıq internet xərcləri və korporativ vergi dərəcəsi kimi müxtəlif meyarlar əsasında müqayisə edərək bu şəhərlərin ən münasib olanlarını tapmağa çalışıblar.
Birinci yeri 90,72 faiz nəticə göstərmiş Budapeşt, sonrakı yerləri Praqa (83,91 faiz), Varşava (82,20 faiz) və Bratislava (78,13 faiz) tutur.
Beləliklə, “Vışeqrad qrupu”nun üzvləri olan dörd dövlətin paytaxtları biznes fəaliyyəti üçün ən əlverişli şəhərlərdir.
San-Fransisko, Nyu-York və Tokio isə yeni biznesə başlamaq üçün ən bahalı üç şəhərdir.
Pərvanə Qarayeva
AZƏRTAC-ın xüsusi müxbiri
Budapeşt
Bölmənin digər xəbərləri
