Vladimir Putin: Söhbət Rusiya–ABŞ sammitinin ləğvindən deyil, təxirə salınmasından gedir
Moskva, 23 oktyabr, AZƏRTAC
Rusiya Prezidenti Vladimir Putin bəyan edib ki, Ukrayna Rusiya ərazisinə uzaqmənzilli sistemlərdən istifadə etməklə zərbələr endirəcəyi təqdirdə, cavab “sarsıdıcı” olacaq.
AZƏRTAC xəbər verir ki, Rusiya Coğrafiya Cəmiyyətinin qurultayından sonra jurnalistlərlə söhbətində o, “Tomahawk” raketlərinin Kiyevə göndərilməsi ilə bağlı müzakirələri “gərginliyi artırmaq cəhdi” adlandırıb.
Dövlət başçısı vurğulayıb ki, dialoq hər zaman müharibənin davam etdirilməsindən üstün tutulmalıdır. Rusiyaya qarşı yeni sanksiyalar ölkənin iqtisadi vəziyyətinə ciddi təsir göstərməyəcək. Sanksiyalar Rusiya ilə ABŞ arasında münasibətləri möhkəmləndirməyən qeyri-dost addımdır.
Rusiya–ABŞ sammitinə hazırlıqla bağlı suala cavabında Putin bildirib ki, görüş və onun keçiriləcəyi yer ABŞ tərəfindən təklif olunub. O, həmçinin vurğulayıb ki, söhbət görüşün ləğvindən deyil, daha çox təxirə salınmasından gedir.
Kreml rəhbəri əminliyini ifadə edib ki, Rusiya və ABŞ təzyiq siyasətindən əl çəkərək gələcək barədə ciddi dialoqa keçsə, konstruktiv əməkdaşlıq üçün çoxsaylı istiqamətlər mövcud olar.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
