DÜNYA
Volodimir Zelenski Avropa Siyasi Birliyinin sammitinə gəlib
Bakı, 1 iyun, AZƏRTAC
Ukrayna Prezidenti Volodimir Zelenski Avropa Siyasi Birliyinin sammitində iştirak etmək üçün Moldovaya gəlib.
AZƏRTAC Moldpres informasiya agentliyinə istinadla xəbər verir ki, Ukrayna lideri səhər saatlarında sammitin keçiriləcəyi Kişineu yaxınlığındakı Bulboaca kəndindəki Mimi şərab kompleksinə gələn ilk dövlət başçısı olub.
Volodimir Zelenski teleqram kanalında müvafiq qeyd etməklə sammitdə iştirakını təsdiqləyib və əlavə edib ki, burada “çoxlu ikitərəfli görüşlər” olacaq. Onun sözlərinə görə, görüşlərdə “qırıcılar koalisiyası, Aİ, NATO, sülh formulu” kimi mövzular müzakirə ediləcək.
Avropa Siyasi Birliyi Fransa Prezidenti Emmanuel Makronun təşəbbüsü ilə Avropa İttifaqı tərəfindən yaradılıb. Bu platforma Avropa ölkələrinin fəaliyyətlərinin siyasi koordinasiyası, habelə Kiyev və Kişineu da daxil olmaqla, Aİ-dən kənar tərəfdaşlarla daha sıx dialoq üçün nəzərdə tutulub.