Vyetnamda Azərbaycana həsr olunan fotosərgi açılıb
Bakı, 25 may, AZƏRTAC
Azərbaycan Xalq Cümhuriyyətinin yaradılmasının 100 illiyi münasibətilə Vyetnamda keçirilən silsilə tədbirlər çərçivəsində paytaxt Hanoyda Azərbaycana həsr edilən fotosərgi açılıb.
AZƏRTAC xəbər verir ki, Azərbaycanın Vyetnamdakı səfirliyinin və Vyetnam-Azərbaycan Dostluq Assosiasiyasının birgə təşkilatçılığı ilə keçirilən sərginin açılış mərasimində Vyetnam parlamentinin sədr müavini Vonq Çu Lu, Milli Assambleyanın üzvü, Vyetnam-Azərbaycan Dostluq Assosiasiyasının sədri Nqhiem Vu Xay, assosiasiyanın üzvləri, Azərbaycan təhsil ocaqlarının məzunları, müxtəlif dövlət və qeyri-dövlət qurumlarının və kütləvi informasiya vasitələrinin nümayəndələri iştirak ediblər.
Səfir Anar İmanov Prezident İlham Əliyevin Sərəncamı ilə bu il Azərbaycan Xalq Cümhuriyyətinin 100 illiyinin qeyd olunduğunu diqqətə çatdırıb. O, müsəlman Şərqində ilk parlamentli dövlət olan AXC-nin xalqımızın qədim dövlətçilik ənənələrini yaşadaraq, hələ 100 il bundan əvvəl müasir dövrə xas dövlət təsisatlarının formalaşdırılmasına nail olduğunu bildirib, Xalq Cümhuriyyətinin dövlətçilik tariximizdə mühüm hadisə olduğunu deyib.
Səfir Azərbaycanın hazırda dünya birliyində müstəqil dövlət kimi bərqərar olmasının, habelə demokratik ənənələrin, insan hüquq və azadlıqlarının qorunmasının, söz və mətbuat azadlığına geniş meydan verilməsinin əsasının məhz Azərbaycan Xalq Cümhuriyyəti dövründə qoyulduğunu vurğulayıb.
Bildirilib ki, cəmi 23 ay mövcud olan AXC-nin hüquqi varisi sayılan Azərbaycan Respublikası 1991-ci ildə öz müstəqilliyini bərpa edib, xalqımızın ümummilli lideri Heydər Əliyev müasir Azərbaycanın banisidir.
A.İmanov Cənubi Qafqaz bölgəsinin lider dövlətinə çevrilən Azərbaycanın uğurlu daxili və xarici siyasətinin, o cümlədən real nəticələr verən genişmiqyaslı islahatların təməlinin məhz ulu öndər Heydər Əliyev tərəfindən qoyulduğunu xüsusi vurğulayıb. Əlavə edib ki, hazırda həmin siyasəti Heydər Əliyevin layiqli davamçısı olan Prezident İlham Əliyev uğurla davam etdirir.
Vyetnam-Azərbaycan Dostluq Assosiasiyasının sədri Nqhiem Vu Xay 100 il bundan əvvəl yaradılan AXC-nin hazırkı müstəqil Azərbaycanın formalaşdırılmasına fundamental töhfə verdiyini deyib. O, hələ bir əsr öncə bütün dünyaya əsas demokratik dəyərlərə sadiqliyini nümayiş etdirən Azərbaycan Xalq Cümhuriyyətinin bir çox ölkə üçün nümunə ola biləcəyini xüsusi qeyd edib.
Assosiasiyanın sədri ölkələrimiz arasındakı əlaqələrin hazırkı sürətli inkişafının təməlinin Vyetnamın sabiq Prezidenti Xo Şi Min və Azərbaycan xalqının ümummilli lideri Heydər Əliyev tərəfindən qoyulduğunu diqqətə çatdıraraq, minlərlə vyetnamlıya dost Azərbaycanda yüksəkkeyfiyyətli ali təhsil alma imkanının verildiyi üçün Azərbaycan hökumətinə, göstərdiyi səmimi qonaqpərvərliyə görə isə xalqımıza dərin təşəkkürünü ifadə edib, bu nəcib işlərin yaddaşlarından heç zaman silinməyəcəyini söyləyib.
Sərgidə Azərbaycan Xalq Cümhuriyyəti dövrünə aid olan şəkillərlə yanaşı, vyetnamlı fotoqraf Ta Nok Suanın ölkəmizdə olarkən çəkdiyi şəkillər də nümayiş etdirilib.
Bölmənin digər xəbərləri
