Xalq Şairi Vaqif Səmədoğlunun 75 illik yubileyi təntənə ilə qeyd edilmişdir VİDEO
Bakı, 5 iyun (AZƏRTAC). İyunun 5-də Azərbaycan Dövlət Akademik Milli Dram Teatrında Xalq Şairi Vaqif Səmədoğlunun 75 illik yubileyi münasibətilə təntənəli tədbir keçirilmişdir.
AZƏRTAC xəbər verir ki, Mədəniyyət və Turizm Nazirliyinin təşkilatçılığı ilə keçirilən yubiley tədbirində dövlət və hökumət rəsmiləri, Milli Məclisin deputatları, tanınmış elm və mədəniyyət xadimləri, ictimaiyyətin nümayəndələri iştirak etmişlər.
Tədbirdə Azərbaycan Respublikası Prezidenti Administrasiyasının rəhbəri, akademik Ramiz Mehdiyev çıxış edərək ədəbiyyatımızın “60-cılar” nəslini təmsil edən Vaqif Səmədoğlunun sevilən sənətkar olduğunu, onun şeirlərinin oxucular tərəfindən böyük maraq və rəğbətlə qarşılandığını bildirmişdir.
Akademik Ramiz Mehdiyev demişdir: “Bu gün Azərbaycan ədəbiyyatı üçün yaddaqalan bir gündür. Məhz bu gün - iyun ayının 5-də tanınmış şair və ictimai xadim Vaqif Səmədoğlunun 75 yaşı tamam olur. Vaqif Səmədoğlunun yaradıcılığı Azərbaycan ədəbiyyatının təkrarolunmaz səhifələrindəndir. Mən onu uzun illərdir tanıyıram. Tanıdığım üçün xüsusi qeyd etmək istəyirəm ki, Vaqif Səmədoğlu ölkədə cərəyan edən ictimai-siyasi hadisələrə həmişə obyektiv qiymət vermiş və düzgün mövqe tutmuşdur. O, xalqını və Vətənini sevən böyük şəxsiyyətdir. Onun fitri istedadı və təvazökarlığı ictimaiyyət tərəfindən həmişə rəğbətlə qarşılanmışdır”. Sonra Prezident Administrasiyasının rəhbəri dövlətimizin başçısı İlham Əliyevin yubilyara təbrik məktubunu və Azərbaycan mədəniyyətinin inkişafında xüsusi xidmətlərinə görə “İstiqlal” ordeni ilə təltif edilməsi haqqında Sərəncamını oxumuşdur (Məktubun və Sərəncamın mətni qəzetin bugünkü nömrəsində dərc olunur).
Azərbaycan Respublikası Prezidenti Administrasiyasının rəhbəri Ramiz Mehdiyev ali mükafatı yubilyara təqdim etmişdir.
Mərasimdə Vaqif Səmədoğlu çıxış edərək göstərilən diqqət və qayğıya görə Prezident İlham Əliyevə minnətdarlığını bildirmişdir.
Tədbirdə Azərbaycan Yazıçılar Birliyinin sədri, Xalq Yazıçısı Anar, Milli Məclisin mədəniyyət komitəsinin sədri, Azərbaycan Milli Elmlər Akademiyasının müxbir üzvü Nizami Cəfərov və Xalq Artisti Ramiz Həsənoğlu çıxış edərək Vaqif Səmədoğlunun zəngin həyat yolundan və ədəbi fəaliyyətindən söhbət açmışlar.
Bildirilmişdir ki, onun “Yeddi şeir” adlı ilk yaradıcılıq məhsulu 1963-cü ildə “Azərbaycan” jurnalında dərc olunmuşdur. Bundan sonra Vaqif Səmədoğlunun dövri mətbuatda əsərləri vaxtaşırı dərc edilmişdir. O, “Oğuz eli” qəzetinin baş redaktoru, Azərbaycan Sovet Ensiklopediyasında incəsənət redaksiyasının müdiri, Cəfər Cabbarlı adına “Azərbaycanfilm” kinostudiyasında kino-aktyor teatrının ədəbi hissə müdiri vəzifələrində çalışmış, 2000-2005-ci illərdə Azərbaycan Milli Məclisinin deputatı olmuşdur.
Qeyd edilmişdir ki, yubilyarın əsərləri bir çox xarici dillərə tərcümə edilmiş, kitabları MDB ölkələrində, Türkiyə və İranda nəşr olunmuşdur.
Natiqlər Vaqif Səmədoğlunun şeirimizə yeni poetik təfəkkür gətirdiyini, onun poeziyasında Azərbaycan insanının bəşəri “yük daşıyıcısı” kimi “qlobal status” qazandığını söyləmişlər.
Vurğulanmışdır ki, yubilyar “Yoldan teleqram”, “Günün baxtı”, “Mən burdayam, İlahi”, “Uzaq yaşıl ada” kitabları, “Bəxt üzüyü” filminə, “Yaşıl eynəkli adam” televiziya tamaşasına yazdığı ssenarilər ilə ümumxalq məhəbbəti qazanmışdır.
Diqqətə çatdırılmışdır ki, öz orijinal üslubu ilə Azərbaycan şeirinə yeniliklər bəxş edən V.Səmədoğlu heç kəsə bənzəməyən bir sənət abidəsi yaratmışdır. Əgər onun şeirlərinin sonunda tarix göstərilməsə, heç vaxt bu poetik nümunəni hansı yaşda qələmə aldığını heç kəs bilməz. Bu, şairin istedadının böyüklüyündən xəbər verir.
Qeyd edilmişdir ki, 1970-ci ildən Azərbaycan Yazıçılar Birliyinin üzvü olan şairin yaradıcılığı həmişə yüksək qiymətləndirilmiş və o, Əməkdar İncəsənət Xadimi, Azərbaycanın Xalq Şairi fəxri adlarına, “Şərəf” ordeninə layiq görülmüşdür.
Bildirilmişdir ki, V.Səmədoğlu insan-cəmiyyət münasibətlərinin dərinliklərinə nüfuz etməyi bacaran, “böhranlı” məqamları həssaslıqla müəyyənləşdirən mütəfəkkir bir sənətkardır.
İstedadın istiqlala xidmət etməli olduğunu vurğulayan mərasim iştirakçıları Prezident İlham Əliyevə şairin yaradıcılığına verdiyi yüksək qiymətə görə minnətdarlıqlarını bildirmiş, yubilyara yeni yaradıcılıq uğurları arzulamışlar.
Sonra ekranda Vaqif Səmədoğlunun özü və şəcərəsi haqqında fikirləri, həyat fəlsəfəsi, düşüncələri təqdim olunmuşdur.
Tədbirin bədii hissəsində “Qaya” vokal instrumental və “Dan ulduzu” ansambllarının müşayiəti ilə tanınmış və gənc müğənnilərin ifasında yubilyarın şeirlərinə bəstələnmiş musiqi nömrələri təqdim edilmiş, pyesləri əsasında hazırlanmış tamaşalardan fraqmentlər göstərilmişdir.
Sonda V.Səmədoğlu 75 illik yubileyinin yüksək səviyyədə qeyd olunmasına görə bir daha Azərbaycan Respublikasının Prezidentinə minnətdarlığını bildirmiş və mərasim iştirakçılarına cansağlığı arzulamışdır.
Bölmənin digər xəbərləri
