Xarici investorların Azərbaycanın sənaye sektoruna marağı artır
Bakı, 27 noyabr, Samirə Quliyeva, AZƏRTAC
Azərbaycan hökuməti ilə BMT-nin Sənaye İnkişafı Təşkilatı arasında əməkdaşlığa dair 2014-2018-ci illər üçün Çərçivə Proqramı imzalanıb. Sənədə əsasən, ölkəmizdə sənayenin inkişaf etdirilməsi ilə bağlı layihələr həyata keçiriləcək, sənayenin müasir innovativ modelləri tətbiq olunacaq. Birgə əməkdaşlıq çərçivəsində ölkəmizin sənaye potensialının gücləndirilməsi, sənaye müəssisələrinin yenidən qurulması və yeni emal sənayesi müəssisələrinin yaradılması da nəzərdə tutulur.
Bu sözləri Yeni Azərbaycan Partiyası (YAP) Siyasi Şurasının üzvü, YAP-ın iqtisadi məsələlər komissiyasının sədr müavini Aydın Hüseynov AZƏRTAC-a müsahibəsində deyib. Ölkəmizdə sənayeləşmənin yeni mərhələyə qədəm qoyduğunu bildirən A.Hüseynov qeyd edib ki, zəngin sənaye ənənələri ilə seçilən və böyük iqtisadi potensiala malik Azərbaycanda qarşıdakı dövrlərdə sənayenin inkişafı ilə bağlı strateji konsepsiya hazırlanıb. Sənəddə sənayedə davamlı inkişafın təmin edilməsi, sənaye məhsullarının rəqabət qabiliyyətinin artırılması, bu sahədə rəqabət mühitinin inkişafı, daxili bazarın qorunmasının stimullaşdırılması, sənaye fəaliyyəti üçün müəyyən edilmiş dövlət dəstəyi mexanizmlərinin və qanunvericilik bazasının təkmilləşdirilməsi ilə bağlı məsələlər öz əksini tapıb.
A.Hüseynov daha sonra deyib: “2014-cü ildə sənaye müəssisələrinin sağlamlaşdırılması, sənayeləşmə siyasətinə uyğun olaraq alternativ enerji qurğu və avadanlığının istehsalı üzrə yeni müəssisələrin istifadəyə verilməsi, Sumqayıt Kimya Sənaye Parkının ərazisinin genişləndirilməsi, regionlarda sənaye parklarının yaradılması və digər tədbirlər nəzərdə tutulur. Dövlət sənaye texnoparkları ilə yanaşı, İKT sənayesinin yeni modeli hesab edilən Yüksək Texnologiyalar Parkının (YTP) yaradılması işlərinə diqqəti yönəldəcək”.
YAP-ın iqtisadi məsələlər komissiyasının sədr müavininin sözlərinə görə, strateji konsepsiyaya əsasən, regionlarda sənaye texnoparklarının və sənaye məhəllələrinin, biznes-inkubatorların yaradılması da nəzərdə tutulub. Artıq ilk layihənin Neftçala rayonunda həyata keçirilməsi nəzərdə tutulub. Bu bölgədə layihələndirmə işlərinə başlanılıb. Sənaye məhəllələrinin Gəncəətrafı rayonlarda, eləcə də Şirvan şəhərində və Siyəzən rayonunda yaradılması planlaşdırılır. Növbəti mərhələdə bu layihənin digər regionlarda da tətbiqi nəzərdə tutulur. Bu ərazilərdə həm yerli, həm də xarici investorlara güzəştlərin müəyyənləşdirilməsində məqsəd odur ki, orada investisiya qoymaq cəlbedici olsun. Bu da həmin ərazilərdə yeni iş yerlərinin yaradılması baxımından çox əhəmiyyətlidir.
Aydın Hüseynov vurğulayıb ki, Azərbaycanda sənaye sahəsində əlverişli sərmayə mühitinin təmin edilməsi, bir sıra güzəştlərin tətbiqi və səmərəli gömrük-vergi rejimi xarici investorların bu sahəyə marağının artmasına səbəb olub. Həyata keçirilən bu tədbirlərin nəticəsidir ki, xarici ölkələrin iş adamları ölkəmizin sənaye sektoruna sərmayə qoyuluşu ilə bağlı investisiya layihələrini hökumətə təqdim ediblər. Ötən vaxtlarda Türkiyə, Kanada, Koreya Respublikası, Çin, Avstriya, Almaniya, Malayziya, Fransa, İtaliya, Yaponiyadan olan potensial şirkətlər tərəfindən 20-dən artıq investisiya təklifi daxil olub. Həmçinin Bakıda keçirilən Beynəlxalq Sənaye Konfransı bir daha beynəlxalq təşkilatların və xarici investorların Azərbaycan sənayesinə marağının güclü olmasına dəlalət edir.
Bölmənin digər xəbərləri
