XƏZƏR DƏNİZ GƏMİÇİLİYİNİN KOLLEKTİVİ YAŞILLAŞDIRMA KAMPANİYASI ÇƏRÇİVƏSİNDƏ MİNDƏN ÇOX AĞAC ƏKMİŞDİR
Bakı, 10 aprel (AZƏRTAC). Aprelin 10-da Azərbaycan Dövlət Xəzər Dəniz Gəmiçiliyinin (ADXDG) kollektivi Suraxanı rayonundakı keçmiş “Binə” ticarət mərkəzinin ərazisində ağacəkmə kampaniyasında iştirak etmişdir.
ADXDG-nin rəisi Aydın Bəşirov bildirmişdir ki, Azərbaycanı yaşıllıqlar diyarına çevirmək, Bakı və Abşeronda, eləcə də respublikamızın bütün bölgələrində ekoloji tarazlığı, ətraf mühitin təhlükəsizliyini təmin etmək məqsədi ilə Prezident İlham Əliyevin göstərişi ilə ardıcıl tədbirlər həyata keçirilir. Təsadüfi deyil ki, ətraf mühitin mühafizəsinə xüsusi önəm verən dövlətimizin başçısı 2010-cu ili ölkəmizdə “Ekologiya ili” elan etmişdir. Prezidentin təşəbbüsü ilə həyata keçirilən bu layihənin reallaşmasında dənizçilər də yaxından iştirak edirlər.
Bugünkü aksiyada ADXDG kollektivinin həvəslə iştirak etdiyini vurğulayan A.Bəşirov, bir hektar ərazidə mindən çox zeytun ağacının əkildiyini demişdir. Qeyd olunmuşdur ki, yeni əkilmiş ağacların suvarılması və onlara müntəzəm qulluq göstərilməsi üçün də müvafiq işlər görüləcəkdir.
######
Bölmənin digər xəbərləri
