Bakı, 15 aprel, K.Əliyeva, M.Dadaşov, AZƏRTAC

Bakının Xəzər rayonundakı 183 nömrəli tam orta məktəbin 80 illik yubileyi qeyd olunub.

AZƏRTAC xəbər verir ki, bu münasibətlə keçirilən tədbirdə Bakı Şəhəri üzrə Təhsil İdarəsinin (BŞTİ), Xəzər Rayon İcra Hakimiyyətinin nümayəndələri, Milli Məclisin deputatları, rayon ictimaiyyətinin təmsilçiləri, məktəbin məzunları iştirak ediblər.

Əvvəlcə məktəbin həyətində şagirdlər “Azərbaycan” mahnısı əsasında fləşmob göstərib, mahnı və rəqslər ifa ediblər. Məktəbin gənc idmançılarının çıxışları maraqla qarşılanıb.

Daha sonra məktəbin foyesində ümummilli lider Heydər Əliyevin portreti önünə gül dəstələri düzülüb.

Tədbir iştirakçıları bu təhsil ocağının yubileyinə həsr edilmiş sərgi ilə tanış olublar.

Məktəbin direktoru Rəhilə Abbasova rəhbərlik etdiyi təhsil müəssisəsinin keçdiyi inkişaf yolundan danışıb. Bildirilib ki, məktəbin təməli 1937-ci ildə qoyulub. Sonralar bu təhsil müəssisəsi əsaslı yenilənib və zamanın tələbinə uyğunlaşdırılıb.

R.Abbasova diqqətə çatdırıb ki, hazırda məktəbdə 992 şagirdin təlim-tərbiyəsi ilə 62 müəllim məşğul olur. Məktəbdə təcrübəli müəllimlərin səylə çalışdıqları, şagirdlərin təhsilində, dünyagörüşünün formalaşmasında əvəzsiz xidmətlər göstərdikləri qeyd edilib.

Bildirilib ki, bu günədək məktəbdə 3.542 məzun olub. 430 yerlik ilk korpusla yeddiillik məktəb kimi fəaliyyətə başlayan bu təhsil ocağı xalq təsərrüfatının müxtəlif sahələri üçün gənc kadrların yetişdirilməsi işini uğurla aparıb. Sonralar onillik məktəbə çevrilən və 1974-cü ildə tikilmiş 630 yerlik ikinci korpusla fəaliyyətini müvəffəqiyyətlə davam etdirən 183 nömrəli məktəb öz mükəmməl təhsili, peşəkar müəllim heyəti ilə seçilməyə başlayıb.

R.Abbasova vurğulayıb ki, məktəbin fəaliyyəti ötən əsrin sonlarında müstəqilliyimizin bərpası ilə əlaqədar yeni keyfiyyət dövrünə qədəm qoyub. Ölkə miqyasında yeni təhsil ocaqlarının tikilməsi, yenidən qurulması dövrü başlanıb. 2006-cı ildə Heydər Əliyev Fondunun təşəbbüsü ilə 200 yerlik ibtidai korpus tikilib və digər korpuslarla birləşdirilib. “Yeniləşən Azərbaycana yeni məktəb” layihəsi çərçivəsində məktəbimizin həyətində tikilmiş həmin korpus bütün avadanlığı və təchizatı ilə son tələblərə cavab verir. Hazırda 1260 yerlik, bir növbəli, beşgünlük rejimlə işləyən və hər kəsin etimadını qazanmış məktəbimiz tərəqqi və çiçəklənmə dövrünü yaşayır.

Qeyd olunub ki, 2009-cu ildən 183 nömrəli tam orta məktəbin maddi-texniki bazasının gücləndirilməsinə, daha yüksək keyfiyyətli təhsil vermək üçün əvvəlki korpusların yenidən qurulmasına, təmirinə, tam yeni avadanlıqla təchiz edilməsinə başlanılıb. Məktəbin əsaslı təmiri üçün dövlət qurumlarının diqqətinin məktəbə yönəldilməsi istiqamətində ardıcıl və prinsipial iş aparılır. Birgə səylər nəticəsində məktəb keyfiyyətli təhsilə imkan verən bütün şərtlərlə 2011-ci ildə əsaslı təmir edilib. Məktəbin görkəmi tamamilə dəyişdirilib, avadanlığı bütünlüklə yenilənib, maddi-texniki bazası son dövrün tələblərinə uyğun olaraq möhkəmlənib. Əvvəllər də bir çox uğurlara imza atmış məktəb görülən bütün bu işlərin nəticəsində daha böyük nailiyyətlər əldə etməkdədir.

Məktəbin bir sıra layihələrdə fəal iştirakını, hər il məzunların yüksək balla müxtəlif ali təhsil müəssisələrinə qəbul olunduqlarını diqqətə çatdıran direktor bildirib ki, qazanılan uğurlarda kollektivin böyük əməyi var. Sadalamaqla bitməyən bu uğurlar bizi məktəbimizin pedaqoji kollektivi qarşısında duran ən ümdə vəzifəni - gənc nəslin sağlam düşüncəli, bilikli və hərtərəfli dövlət qurucusu kimi yertişdirilməsini daha böyük əzmlə yerinə yetirməyə ruhlandırır. Daşıdığımız yükün ağır, eyni zamanda, çox şərəfli olduğunu dərk edir, cəmiyyət üçün faydalı vətəndaşlar yetişdirməyə çalışırıq. Biz azad, suveren, bütöv Azərbaycanın qurucularının yetişdirilməsinə bütün gücümüzü, qəlbimizin odunu-alovunu sərf etməyi bacarmalıyıq. Çünki biz xalq üçün çalışırıq, xalqın müəllimləriyik.

Milli Məclisin deputatı Rauf Əliyev bildirib ki, 183 nömrəli məktəb Xəzər rayonunun nümunəvi təhsil müəssisələrindəndir. Bu məktəbin məzunları arasında tanınmış insanlar çoxdur. Prezident İlham Əliyevin təhsil və tədrisin təşkili ilə bağlı qarşıya qoyduğu vəzifələr bu gün məktəbin kollektivi tərəfindən uğurla icra olunur. Ötən müddətdə xalqımızın zəngin maarifçilik ənənələrini layiqincə davam etdirən məktəb təlim-tərbiyə və tədris işinin təşkilində, təhsilli və vətənpərvər gənclərin yetişdirilməsində böyük nailiyyətlər qazanıb. R.Əliyev məktəbin kollektivini yubiley münasibətilə təbrik edib, uğurlar arzulayıb.

Tədbirdə çıxış edən BŞTİ-nin müdiri Məhəbbət Vəliyeva paytaxt təhsilinin inkişafı istiqamətində əldə olunan uğurlardan, həyata keçirilən layihələrdən danışıb, respublikamızda şagirdlərin bərabər təhsil imkanları üçün dövlət tərəfindən hər cür şəraitin yaradıldığını deyib.

Hazırda təhsil sahəsinə dövlətimiz tərəfindən xüsusi diqqət göstərildiyini vurğulayan M.Vəliyeva qeyd edib ki, ölkənin bütün regionlarında yeni məktəblər tikilir, təhsil müəssisələrində təmir işləri aparılır. BŞTİ-nin müdiri məktəblərdə gənc nəslin inkişafı, layiqli vətəndaşlar kimi yetişdirilməsi üçün həyata keçirilən layihələrdən, görülən işlərdən danışıb. Yaxın günlərdə BŞTİ tərəfindən 183 nömrəli məktəbin həyətində güləkmə aksiyasının keçiriləcəyi bildirilib.

M.Vəliyeva məktəbin 80 illik yubileyi münasibətilə kollektivi təbrik edib, daha böyük uğurlar arzulayıb.

Tədbirdə Yeni Azərbaycan Partiyası Xəzər rayon təşkilatının sədri Namiq Əhmədov, Xəzər rayon Ziyalılar Cəmiyyətinin sədri, professor Təvəkkül Səlimov, Azərbaycan Təhsil İşçiləri Azad Həmkarlar İttifaqının Xəzər rayon komitəsinin sədri Həzərxan Əbilov, Şuşa Şəhər İcra Hakimiyyəti başçısının müavini Vüsalə Fətəliyeva, Azərbaycanın Rus İcmasının sədri, Milli Məclisin deputatı Mixail Zabelin, məktəbin təqaüddə olan veteran müəllimləri təhsil müəssisəsinin kollektivini yubiley münasibətilə təbrik ediblər. Son illər ölkəmizdə aparılan təhsil islahatlarından danışan natiqlər ümummilli lider Heydər Əliyevin hələ keçən əsrin 70-ci illərində təhsilin inkişafına verdiyi töhfələri xüsusi vurğulayıblar. Diqqətə çatdırılıb ki, Ulu Öndərin siyasi kursunu uğurla davam etdirən Prezident İlham Əliyev də həmişə təhsilə böyük diqqət və qayğı göstərir.

Rayon təhsil şöbəsinin müdiri İlham Məmmədov videobağlantı vasitəsilə məktəbin kollektivinə təbriklərini çatdırıb, müəllimlərə təhsilimizin inkişafı istiqamətində daha böyük uğurlar arzulayıb.

Məktəbin məzunları təhsil müəssisəsi ilə bağlı xatirələrini bölüşüblər.

Yubiley tədbiri şagirdlərin hazırladıqları bədii kompozisiya və məktəbin məzunları olmuş gənc ifaçıların çıxışları ilə davam edib.

Sonda səmərəli fəaliyyətinə görə fərqlənən müəllimlər fəxri fərmanlarla təltif olunublar.