XOCALI SOYQIRIMI İLƏ BAĞLI ÜÇ KİTABIN TƏQDİMATI KEÇİRİLMİŞDİR
Bakı, 23 fevral (AZƏRTAC). Fevralın 23-də Azərbaycanda Vətəndaş Cəmiyyətinin İnkişafına Yardım Assosiasiyası (AVCİYA) Xocalı soyqırımı ilə bağlı erməni vəhşiliyini əks etdirən kitabların təqdimatı keçirilmişdir.
Assosiasiyanın vitse-prezidenti Vəli Əlibəyov bildirmişdir ki, erməni terroru haqqında faktları dünya ictimaiyyətinə çatdırmaq məqsədi ilə təşkilat 2006-cı ildən etibarən tədbirlər həyata keçirir. Bu tədbirlər çərçivəsində “Two photo-talks on a tragedy” (Faciə barədə iki foto-söhbət), “Historical facts vs. the Armenian myths” (Tarixi faktlar erməni miflərinə qarşı) və “Forgotten or falsified truths” (Unudulmuş və ya saxtalaşdırılmış həqiqətlər) kitabları ingilis dilində nəşr olunmuş və onlara CD əlavə edilmişdir. Kitablar Avropa Şurası Parlament Assambleyasındakı Azərbaycan nümayəndə heyəti vasitəsilə qurumda təmsil olunan deputatlara təqdim edilmişdir.
Xocalı soyqırımı haqda vəhşilikləri dünya ictimaiyyətinə çatdırmaq məqsədi ilə hazırlanmış “Two photo-talks on a tragedy” kitabı AZƏRTAC-ın fotomüxbiri İlqar Cəfərovun və tanınmış fotoqraf Mirnaib Həsənoğlunun faciə zamanı çəkdikləri fotoşəkillər əsasında hazırlanmışdır.
“Historical facts vs. the Armenian myths” və “Forgotten or falsified truths” kitabları isə dünyada tanınmış şəxslərin əsərlərində, eləcə də tarixi mənbələrdə ermənilərin azərbaycanlılara qarşı törətdikləri vəhşiliklərdən bəhs edən fikirlər əsasında hazırlanmışdır.
######
Bölmənin digər xəbərləri
