Xocalı soyqırımı qurbanlarının xatirəsi Avstraliyada anılmışdır
Bakı, 24 fevral (AZƏRTAC). Xocalı soyqırımının 21-ci ildönümü və bu dəhşətli faciənin qurbanlarının xatirəsi hər il olduğu kimi, bu il də Avstraliyanın Sidney şəhərində anılmışdır.
Avstraliya-Azərbaycan-Türk Dostluq Cəmiyyətindən AZƏRTAC-a bildirmişlər ki, Türk Dayanışma Dərnəyində təşkil olunmuş tədbirdə Xocalı faciəsi ilə bağlı Heydər Əliyev Fondu tərəfindən hazırlanıb yerli diasporaya göndərilən videomateriallar nümayiş olunmuş, kitablar və broşürlər paylanmışdır.
Tədbir iştirakçıları Azərbaycan torpaqlarının Ermənistan tərəfindən işğalı faktı, erməni və rus qoşunları tərəfindən yerli dinc azərbaycanlılara qarşı qətliamların törədilməsi, Xocalı soyqırımının dünyada tanınmasında türk xalqlarının birgə fəaliyyəti və digər mövzularda müzakirələr aparmışlar.
Bundan başqa, fevralın 22-də Avstraliya-Azərbaycan-Türk Dostluq Cəmiyyətinin təşəbbüsü ilə ölkənin ən böyük məscidi olan Gelibolu Camisində üç minədək insanın iştirak etdiyi cümə namazından öncə Xocalı soyqırımı barədə məlumat verilmiş, qətlə yetirilən insanların ruhuna dualar oxunmuşdur.
Eyni zamanda, Sidney şəhərində fəaliyyət göstərən “Azərbaycanın Səsi” (Voice of Azerbaijan) radiosu soyqırımı ilə əlaqədar xüsusi veriliş hazırlaymışdır. Veriliş fevralın 25-də yerli vaxtla saat 22:00-də yayımlanacaqdır.
Bölmənin digər xəbərləri
