Xocalı soyqırımını törədənlər hələ də cəzalarını almayıblar
Bakı, 26 fevral, AZƏRTAC
AMEA-nın Folklor İnstitutunda Xocalı soyqırımının 27-ci ildönümü ilə bağlı anım tədbiri keçirilib.
İnstitutdan AZƏRTAC-a bildirilib ki, öncə faciə qurbanlarının əziz xatirəsi bir dəqiqəlik sükutla yad edilib. Folklor İnstitutunun direktoru, akademik Muxtar Kazımoğlu tədbirdə deyib: “Hələ 1991-ci ildə ermənilər havadarlarının yardımı ilə Xocalını blokadaya almışdılar. Bütün avtomobil yolları bağlanmışdı, Xocalıya yalnız vertolyotla gedib-gəlmək mümkün idi. Ermənilər əvvəlcə toplardan atəş açdılar, şəhəri yanğına qərq etdilər. Ardınca şəhərə qoşun girdi. Əhali şəhərdən çıxmaqla da canını qurtara bilmədi. Milli Qəhrəman Əlif Hacıyev və silahdaşları həmin gecə şəhid oldular. Çoxu uşaq, qadın, qoca olmaqla 613 nəfər dinc sakin əzabla öldürüldü. Əsirlərlə vəhşicəsinə rəftar olundu. Bu soyqırımının dünyaya tanıdılması istiqamətində öhdəmizə böyük işlər düşür. Ermənilər siyasi məqsədlərinə çatmaq üçün bütün vasitələrdən istifadə edirlər. Onların qarşısını almaq üçün səfərbər olmalıyıq”.
Sonra institutun folklor studiyasının Xocalı faciəsi ilə bağlı hazırladığı film nümayiş olunub.
Tədbirdə institutun əməkdaşları çıxış edərək bildiriblər ki, bu gün erməni ideoloqları Xocalı faciəsini necə törətdikləri haqqında açıq-aşkar danışırlar. Təəssüf ki, bunlara rəğmən onlar hələ də cəzalarını almayıblar.
Bölmənin digər xəbərləri
