XOCALI VƏ LİDİÇE QARDAŞLAŞMIŞ ŞƏHƏRLƏR OLACAQDIR
Praqa, 22 fevral (AZƏRTAC). Fevralın 26-da Praqada fəaliyyət göstərən Azər-Çex Cəmiyyətinin təşkilatçılığı və Azərbaycanın Çexiyadakı səfirliyinin dəstəyi ilə Lidiçe Xatirə Kompleksində Xocalı faciəsinin 18-ci ildönümü ilə əlaqədar tədbir keçiriləcəkdir.
Həmin gün Xocalı və Lidiçe şəhərlərinin icra hakimiyyəti başçıları tərəfindən bu şəhərlərin qardaşlaşması barədə protokol imzalanacaqdır.
Sonra Lidiçe muzeyində Heydər Əliyev Fondunun hazırladığı fotosərgi açılacaq, çexiyalı mütəxəssis Helena Masnikova Ermənistan-Azərbaycan, Dağlıq Qarabağ münaqişəsi haqqında məruzə ilə çıxış edəcək və Xocalı qətliamından bəhs edən sənədli film nümayiş olunacaqdır.
Tədbirdə Çexiyanın mədəniyyət naziri Vatslav Riedlbauch, Çexiya Parlamenti və Senatının, Çexiyadakı diplomatik korpusun əməkdaşları, Azərbaycan Milli Məclisinin deputatları, Xocalı Şəhər İcra Hakimiyyətinin, bu ölkədəki diasporumuzun nümayəndələri və başqaları iştirak edəcəklər.
Lidiçe 1942-ci ildə alman faşistləri tərəfindən yerlə-yeksan edilmiş, əhalisi terrora məruz qalmışdır. Xocalı və Lidiçe faciələrinin oxşarlığı Azər-Çex Cəmiyyəti tərəfindən 2007-ci il fevralın 26-da Lidiçe Muzeyi və Xatirə Kompleksində Xocalı faciəsinin 15 illiyinə həsr olunmuş, 3 ay davam edən silsilə tədbirlər keçirilməsinə səbəb olmuşdur.
Bölmənin digər xəbərləri
