Xocavənd, 17 oktyabr (AZƏRTAC). Xocavənd rayonunun işğaldan azad edilmiş Nərgiztəpə ərazisində Qarabağ müharibəsində şəhid olmuş Vətən övladlarının xatirəsinə ucaldılmış abidə kompleksi istifadəyə verilmişdir.

AZƏRTAC xəbər verir ki, bu münasibətlə “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyi İdarə Heyəti üzvlərinin, rayon ictimaiyyəti nümayəndələrinin, şəhidlərin ailə üzvlərinin, keçmiş döyüşçülərin iştirakı ilə mərasim keçirilmişdir.

Mərasim iştirakçıları abidə kompleksi önünə əklil və gül-çiçək dəstələri düzmüş, şəhidlərin ruhuna ehtiramlarını bildirmişlər. Azərbaycanın dövlət himni səsləndirilmiş, şəhidlərin xatirəsi bir dəqiqəlik sükutla yad edilmişdir.

Mərasimdə çıxış edən Xocavənd Rayon İcra Hakimiyyətinin başçısı Eyvaz Hüseynov tədbir iştirakçılarını Azərbaycan Respublikasının dövlət müstəqilliyinin bərpasının 20-ci ildönümü münasibətilə təbrik etmiş, Azərbaycanın keçdiyi müstəqillik yolundan, 20 il əvvəl öz suverenliyinə nail olan Azərbaycanın həmin dövrdə qarşılaşdığı çətinliklərdən, Ermənistanın respublikamıza qarşı apardığı qəsbkarlıq müharibəsindən danışmışdır. Natiq müstəqilliyimizin bərpasının ilk illərində ölkəmizin ciddi problemlərlə üzləşdiyini, yalnız ümummilli lider Heydər Əliyevin ikinci dəfə hakimiyyətə qayıdışından sonra respublikada sabitliyin yarandığını, siyasi və iqtisadi islahatlara başlandığını qeyd etmişdir.

Bildirilmişdir ki, 1993-cü ilin sonları - 1994-cü ilin əvvəllərində Xocavənd rayonunun düşməndən azad edilməsi uğrunda qanlı döyüşlər getmiş və rayonun bir hissəsi işğaldan azad edilmişdir. Ümummilli lider Heydər Əliyev 1994-cü il aprelin 10-da bu ərazidə Xocavənd taborunun döyüşçüləri ilə görüşmüş, onlarla xatirə şəkli çəkdirmişdir.

Respublikamızın ərazi bütövlüyü uğrunda canlarından keçmiş Vətən övladlarının xatirəsini əbədiləşdirmək məqsədi ilə Nərgiztəpə ərazisində abidə kompleksi yaradılmış, ümummilli lider Heydər Əliyevin əsgərlərlə görüşdüyü Daşlıtəpə ərazisində xatirə lövhəsi, bu səfəri əks etdirən fotoşəkillərin və ümummilli liderin əsgərlər qarşısında çıxışının əks olunduğu plakatlar qoyulmuşdur. Ərazidə döyüşlər zamanı həlak olmuş və yaralanmış Vətən övladlarının qanlarının töküldüyü yerlərdə xatirə lövhələri qurulmuşdur. Nərgiztəpədə inşa edilmiş abidənin üzərindəki qranit lövhədə Qarabağ müharibəsində şəhid olmuş 145 Xocavənd sakininin adları həkk olunmuşdur. Təpənin üzərində bayraq meydanı yaradılmış və Azərbaycanın dövlət bayrağı ucaldılmışdır.

“Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyi İdarə Heyətinin sədri Bayram Səfərov, Beyləqan Rayon İcra Hakimiyyətinin başçısı İrşad Əliyev, Xocalı Rayon İcra Hakimiyyətinin başçısı Şahmar Usubov, Milli Məclisin deputatı Elman Məmmədov, “Xocavənd” qəzetinin redaktoru Gültəkin Ağayeva və başqaları tədbirdə çıxış edərək, 1990-cı illərin əvvəllərində baş vermiş hadisələrdən, Ermənistanın Azərbaycana qarşı apardığı işğalçılıq siyasətindən danışmışlar.

Çıxışlarda işğal altındakı torpaqlarımızın, o cümlədən Xocavənd rayonunun Prezident İlham Əliyevin qətiyyəti sayəsində azad ediləcəyinə inam ifadə olunmuşdur.

######