Yaddaşlardan silinməyəcək faciə
Bakı, 1 aprel (AZƏRTAC). Ümumrusiya Azərbaycan Konqresinin (ÜAK) Murmansk regional ofisində konqresin Murmansk vilayət bölməsi (MVB) nəzdində fəaliyyət göstərən Azərbaycan gənclər təşkilatlarının liderləri ilə birlikdə azərbaycanlıların soyqırımı qurbanlarının xatirəsinə həsr olunmuş tədbir keçirmişdir.
Tədbiri giriş nitqi ilə ÜAK MVB-nin sədri və Murmansk vilayəti İctimai Palatasının üzvü Afil Hüseynov açmışdır. Azərbaycanlıların dəfələrlə ermənilər tərəfindən soyqırıma məruz qaldığını, doğma yurd-yuvalarından didərgin salındığını vurğulayan natiq bildirmişdir ki, azərbaycanlıların məhv edilməsi və əzəli torpaqlarımızın Ermənistanın xeyrinə qopardılması faktlarının üstündən uzun illər sükutla keçilmiş, etiraz səsini ucaldanlara isə millətçi damğası vurulmuşdur. Ümummilli lider Heydər Əliyevin 1998-ci il martın 26-da imzaladığı “Azərbaycanlıların soyqırımı haqqında” Fərman ermənilərin “böyük Ermənistan” yaradılması ideyası naminə törətdikləri misli görünməmiş vəhşiliklərə siyasi-hüquqi qiymət verən birinci sənəd olmuşdur. Bildirilmişdir ki, XX əsrin əvvəlində, 1905-1907 illərdə ermənilər əvvəlcə Bakı şəhərində, sonra isə Azərbaycanın digər bölgələrində soyqırımı törətmişlər. 1918-ci il hadisələri isə öz miqyasına görə daha dəhşətli olmuşdur. Ermənilər Bakı, Quba, Şamaxı, Gəncə, Naxçıvan, Qarabağ, Zəngəzur, İrəvan və digər qəzalarda azərbaycanlılara divan tutmuşlar. Bəzi məlumatlara görə, həmin dövrdə minlərlə insan vəhşicəsinə qətlə yetirilmiş, yüzlərlə kənd yerlə-yeksan edilmişdir. 1918-ci il martın axırı - aprelin əvvəlində erməni bolşeviklərin rəhbərliyi və fəal iştirakı ilə törədilmiş misli görünməmiş qətliamın qurbanı 15 mindən çox günahsız insan olmuşdur. Azərbaycan Xalq Cümhuriyyəti dövründə - 1919 və 1920-ci illərdə martın 31-i matəm günü kimi qeyd edilmişdir. 1918-ci ildə daşnak liderlərindən biri Andranik Göycə və Zəngəzurda Azərbaycan kəndlərini talan etmiş, yandırmış, dinc əhalini misli görünməmiş qəddarlıqla məhv etmişdir. Bütün bu vəhşi aksiyalara bolşevik-daşnak komissar Stepan Şaumyan rəhbərlik etmişdir. Ermənilər azərbaycanlılara qarşı soyqırımı siyasətini SSRİ dövründə də davam etdirmişlər. Ötən əsrin 20-30-cu illərində, habelə İkinci dünya müharibəsindən sonra ermənilər azərbaycanlıların həbs olunmasına və Sibirə sürgün edilməsinə, xalq düşməni damğası ilə güllələnməsinə, din xadimlərinin və görkəmli ziyalıların məhv edilməsinə, günahsız insanlara qarşı əsassız repressiyaların aparılmasına rəvac vermişlər. 1988-ci ildə, Dağlıq Qarabağın Ermənistana birləşdirilməsi məsələsi qaldırıldıqdan sonra Ermənistan ərazisindəki əzəli Azərbaycan torpaqlarından yüz minlərlə insan qovulmuş, 400 adam vəhşicəsinə qətlə yetirilmişdir. Azərbaycan torpaqlarının 20 faizinin işğal edilməsi nəticəsində Ermənistandan olan qaçqınlarla birlikdə Dağlıq Qarabağdan və ətraf rayonlardan məcburi köçkünlərin sayı 1 milyonu ötmüş, həmin bölgələrdə bir azərbaycanlı belə qalmamışdır. 1992-ci ildə erməni cəlladları amansızlığına görə analoqu olmayan Xocalı soyqırımını törətmiş, yüzlərlə insanı, o cümlədən qadın, uşaq və ahılları əsir götürmüşlər.
Tədbir iştirakçılarının diqqətinə azərbaycanlıların soyqırımına həsr edilmiş kitab, qəzet, jurnal və fotoşəkillər təqdim edilmişdir.
Anım mərasiminə Murmansk vilayət hökumət və bələdiyyə orqanlarının nümayəndələri, Milli Mədəniyyət Mərkəzinin rəhbərləri və üzvləri, jurnalistlər dəvət edilmişdir. Onlar Azərbaycan dövlətçiliyinin inkişafında və möhkəmlənməsində ümummilli lider Heydər Əliyevin misilsiz xidmətlərini vurğulamışlar. Tədbirin sonunda Heydər Əliyev Fondunun təqdim etdiyi videoçarx nümayiş etdirilmişdir.
Bölmənin digər xəbərləri
