Yaponiya hökuməti 2011-ci il zəlzələsi ilə bağlı xatirə mərasimini təxirə salmağı planlaşdırır
Tokio, 4 mart, AZƏRTAC
Yaponiya hökuməti 2011-ci ilin martında baş vermiş zəlzələ və atom qəzası nəticəsində həlak olanların xatirəsini anma mərasimini yeni koronavirusun yayılması təhlükəsi ilə əlaqədar təxirə salmağı planlaşdırır.
AZƏRTAC xəbər verir ki, bununla əlaqədar tədbirin martın 11-də keçirilməsi nəzərdə tutulurdu.
Qeyd edilir ki, hökumət tədbirin daha az dəvət edilənlərlə və ya yeni koronavirusa qarşı daha ciddi tədbirlərin görüldüyü şəraitdə keçirilməsi imkanlarını araşdırır.
Xatırladaq ki, ötən həftə Yaponiyanın Baş Naziri Şinzo Abe kütləvi idman və mədəni tədbirlərin təxirə salınması, ləğv edilməsi və ya miqyasının azaldılması barədə təkliflə çıxış edib.
Bildirilir ki, hazırda koronavirusun yayılması ilə bağlı həlledici məqamın yaxınlaşdığını bildirən hökumət orqanları anım mərasiminin təxirə salınması ilə bağlı son hazırlıq işlərini yekunlaşdırmaqdadır.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
