Yaponiyanın “Bilateral insight” jurnalında Azərbaycan haqqında məqalə dərc edilmişdir VİDEO
Tokio, 22 may (AZƏRTAC). Tokioda ingilis və yapon dillərində nəşr olunan və bu ölkədəki diplomatik heyətin fəaliyyətindən bəhs edən “Bilateral insight” (“Qarşılıqlı anlaşma”) jurnalında Azərbaycan haqqında geniş məqalə dərc edilmişdir.
Jurnalın müxbirinin suallarını cavablandıran Azərbaycanın Yaponiyadakı səfiri Gürsel İsmayılzadə ölkəmizin əlverişli coğrafi mövqeyi, təbii ehtiyatları, müstəqilliyini bərpa etdikdən sonra keçdiyi çətin və şərəfli yol, sürətli inkişaf nəticəsində son illər əldə edilmiş böyük uğurlar barədə oxuculara ətraflı məlumat verir. Bildirir ki, 1991-ci ildə SSRİ-nin parçalanması nəticəsində müstəqilliyini bərpa etmiş Azərbaycanda bu gün ümumi daxili məhsulun artımı ikirəqəmli göstəricilərlə ifadə olunur, iqtisadi inkişaf faizlə deyil, dəfələrlə hesablanır.
Qeyd olunur ki, son 10 ildə Azərbaycanın təbii ehtiyatlarının mənimsənilməsinə yönəldilmiş 150 milyard dollar dəyərində investisiyaların yarıdan çoxu xaricdən cəlb edilmişdir. Bu da ölkəmizin əməkdaşlıq üçün açıq olduğunu və etibarlı tərəfdaşa çevrildiyini göstərir.
Məqalədə Azərbaycanda neft hasilatının tarixi, 1848-ci ildə sənaye üsulu ilə ilk neft quyusunun fontan vurmasından sonra Rotşild və Nobel kimi tanınmış iş adamlarının buraya gəlişi barədə də geniş məlumat verilir. Qeyd olunur ki, İkinci Dünya müharibəsində faşizm üzərində qələbənin əldə edilməsində Bakı neftinin müstəsna rolu olmuşdur. Müstəqillik bərpa edildikdən sonra isə ümummilli lider Heydər Əliyevin işləyib hazırladığı neft strategiyası 1994-cü ildə “Əsrin müqaviləsi”nin imzalanması ilə nəticələnmiş, Yaponiyanın “İtochi” və “İmpeks” şirkətləri də həmin müqaviləyə qoşulmuşlar. Hazırda Azərbaycanın təbii qazının Avropaya nəqli ilə bağlı həyata keçirilən nəhəng layihələrdə də yapon şirkətləri böyük həvəslə iştirak edirlər.
Bildirilir ki, Azərbaycan Prezidenti İlham Əliyevin iqtisadiyyatın şaxələndirilmiş inkişafı siyasəti öz bəhrəsini vermişdir və enerji mənbələrinin ölkə iqtisadiyyatındakı payı 10 il əvvəlki 90 faizdən hazırda 47,3 faizə enmişdir. Eyni zamanda, alternativ və bərpa olunan enerji mənbələrinin inkişafı istiqamətində də mühüm addımlar atılır. Azərbaycanın günəş elektrik stansiyaları inşa etmək layihəsi bu sahədə yapon şirkətləri ilə əməkdaşlığa geniş imkanlar açır.
Məqalədə Azərbaycanda həyata keçirilən nəhəng layihələrə investisiya qoyuluşunda yapon banklarının fəal iştirakı xüsusi qeyd olunur. Bildirilir ki, bu gün yapon şirkətləri Azərbaycanın şəhər və kəndlərində su və kanalizasiya xətlərinin yenilənməsi, elektrik stansiyalarının inşası və xəstəxanalar üçün avadanlığın alınmasına həm kredit, həm qrant, həm də texniki yardım şəklində kömək edirlər.
Azərbaycan, eyni zamanda, Yaponiya ilə müasir informasiya texnologiyaları və kosmosun mənimsənilməsi sahəsində təcrübə mübadiləsində maraqlıdır. Ölkəmizin keçmiş SSRİ respublikaları arasında Rusiyadan sonra ilk dəfə olaraq öz süni peykini orbitə çıxardığı, hazırda ikinci süni peykin buraxılması məqsədilə aparılan hazırlıq işlərinə yapon şirkətlərinin də cəlb edildiyi vurğulanır.
Azərbaycan ilə Yaponiya arasında, həmçinin turizm, kənd təsərrüfatı və infrastruktur sahələrində əməkdaşlıq üçün geniş potensialın olduğu, hər ay orta hesabla 200-300 yapon turistin ölkəmizi ziyarət etdiyi diqqətə çatdırılır.
Məqalədə Azərbaycanın Asiya ilə Avropa arasındakı mövqeyinin yapon şirkətləri üçün əlverişli imkanlar açdığı, burada istehsal ediləcək məhsulların sonradan Avropa ölkələrinə, Rusiyaya və Yaxın Şərqə ixrac imkanlarının olduğu qeyd edilir və onlar Azərbaycanın istehsal potensialından səmərəli istifadəyə dəvət edilirlər.
Yaponiyanın Baş naziri Şinzo Abenin Mərmərə tunelinin açılışı zamanı söylədiyi “Gəlin Tokiodan çıxan və İstanbuldan keçərək Londona çatacaq sürət qatarı haqqında birlikdə xəyal edək” fikrini xatırladan səfir vurğulayır ki, gələcəyin həmin qatarı həm də Azərbaycandan keçəcəkdir. 2015-ci ildə istifadəyə verilməsi planlaşdırılan və “Dəmir İpək Yolu” adını almış Bakı-Tbilisi-Qars dəmir yolu xətti həm də həmin məqsədə xidmət edəcəkdir.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
