QAN YADDAŞI
Yardımlıda 31 Mart - Azərbaycanlıların Soyqırımı Gününə həsr olunmuş “dəyirmi masa” keçirilmişdir
Yardımlı, 31 mart (AZƏRTAC). Yardımlı Rayon İcra Hakimiyyətində 31 Mart - Azərbaycanlıların Soyqırımı Gününə həsr olunmuş “dəyirmi masa” keçirilmişdir.
AZƏRTAC xəbər verir ki, tədbir iştirakçıları soyqırımı qurbanlarının xatirəsini bir dəqiqəlik sükutla yad etmişlər.
Çıxış edənlər ermənilər tərəfindən total ideoloji təcavüz, terror və irimiqyaslı hərbi əməliyyatlarla müşayiət olunan soyqırımı nəticəsində yüz minlərlə soydaşımızın dədə-baba torpaqlarından qovulduğunu, müxtəlif təzyiq və təhqirlərə məruz qaldığını bildirmişlər.
Toplantıda erməni millətçilərinin 200 ilə yaxın bir dövrdə azərbaycanlılara qarşı törətdikləri vəhşiliklər pislənmiş, soyqırımı ilə bağlı həqiqətlərin dünya ictimaiyyətinə çatdırılmasında, bu hadisələrə hüquqi-siyasi qiymətin verilməsində ümummilli lider Heydər Əliyevin başlatdığı məqsədyönlü fəaliyyətin Prezident İlham Əliyev tərəfindən uğurla davam etdirildiyi diqqətə çatdırılmışdır.
Çıxışlarda ermənilərin zaman-zaman azərbaycanlılara qarşı həyata keçirdikləri soyqırımı siyasəti pislənərək mənfur düşmənlərimizin çirkin əməllərini bu gün də davam etdirdiyi, Azərbaycanın 20 faiz ərazisinin zəbt olunduğu, soydaşlarımızın olmazın əziyyətlərə məruz qaldığı, əzəli torpaqlarından qovularaq qaçqın və köçkün həyatı yaşadıqları bildirilmişdir.
Natiqlər nüfuzlu beynəlxalq təşkilatların, o cümlədən BMT Təhlükəsizlik Şurasının qətnamələrinə məhəl qoymayan ermənilərin tezliklə layiqli cəzalarını alacaqlarına, zəbt olunmuş torpaqlarımızın azad olunacağına, qaçqın və məcburi köçkün ailələrinin doğma torpaqlarına qayıdacaqlarına əminliklərini ifadə etmişlər.