YARIMİLLİK PROQNOZA ARTIQLAMASI İLƏ ƏMƏL EDİLMİŞDİR
Fondun gəlirlərinin tərkibində məcburi dövlət sosial sığorta haqları 622,1 milyard manat olmuş, proqnoz 100,5 faiz yerinə yetirilmişdir. Altı ayda dövlət büdcəsindən ayırmaların məbləği 342,5 milyard manat təşkil etmişdir. Məcburi dövlət sosial sığorta haqları üzrə toplanmış vəsaitin 209,7 milyard manatı büdcədən maliyyələşən təşkilatlardan daxil olmuşdur. Bu ilin əvvəlindən qeyri-büdcə təşkilatlarından və özəl sektordan məcburi dövlət sosial sığorta haqlarının vaxtında yığılmasına artırılan diqqət əldə olunan gəlirlərin tərkibində bu sahələrin xüsusi çəkisinin xeyli artmasına şərait yaratmışdır. Belə ki, ötən müddətdə qeyri-büdcə təşkilatlarından və özəl sektordan 412,4 milyard manat məcburi dövlət sosial sığorta haqqı toplanmışdır ki, bu da ötən ilin müvafiq dövründəkindən 41,7 milyard manat, altı aylıq proqnozdan isə 4 milyard manat çoxdur.
Fondun gəlirlərinin artması cari ilin birinci yarısında pensiyaların, müavinətlərin və digər sosial ödənişlərin vaxtında maliyyələşdirilməsinə imkan vermişdir. Bütövlükdə, yanvar-iyun ayları ərzində bu məqsədə 950,1 milyard manat vəsait yönəldilmişdir. Bu, keçən ilin müvafiq dövründəkindən 115,1 milyard manat və ya 13,8 faiz artıqdır.
Xərclərin tərkibində əsas sosial ödənişlər olan pensiyaların məbləği 567,7 milyard, işləməyən pensiyaçılara müavinətlər 76,4 milyard, kommunal, nəqliyyat və digər güzəştlərin müavinətlərlə əvəz olunması üzrə xərclər 63,9 milyard, digər müavinətlər 195,4 milyard manat təşkil etmişdir. Bundan başqa, məşğulluq və əlillərin sosial müdafiəsi tədbirlərinin həyata keçirilməsinə, sanatoriya-kurort müalicəsi üzrə xərclərin maliyyələşdirilməsinə və digər xərclərə 46,7 milyard manat yönəldilmişdir.
