Ekologiya və Təbii Sərvətlər Nazirliyinin Bakı departamentinin əməkdaşları ətraf mühitə ziyan vurmaqla inşaat işləri aparan fiziki və hüquqi şəxslərə cərimə tətbiq etmişlər. Nazirliyin mətbuat xidmətindən
AZƏRTAC-ın müxbirinə bildirmişlər ki, Sabunçu rayonu ərazisində Y.Əliyev küçəsindəki 2954-57-ci məhəllədə 1500 çoxillik sərv və şam ağacının bitdiyi 2 hektar sahə fərdi evlərin tikintisi və “Azpetrol” şirkəti üçün ayrılaraq hasara alınmışdır. Bununla əlaqədar, Bakı Şəhər İcra Hakimiyyətinin başçısı H.Abutalıbova və Sabunçu rayon icra hakimiyyətinin rəhbərliyinə telefonoqram göndərilmişdir. İnşaat işlərini həyata keçirən fiziki və hüquqi şəxslərə qarşı məcburi cərimə tətbiq edilmiş, ərazi departamentin nəzarəti altına götürülmüşdür.
Digər belə fakt Binəqədi rayonunun Naxçıvani küçəsindəki 3068-ci məhəllədə qeydə alınmışdır. Burada 198 ağacın və kolun yetişdiyi 1,6 hektar sahədə “Olimp” şirkəti tikinti işlərinə başlamışdır. Yaşıllıq üçün təhlükə törədən bu fakt aktlaşdırılmış, paytaxt merinə və Binəqədi Rayon İcra Hakimiyyətinin başçısına müraciət göndərilmiş, “Olimp” şirkətinə qarşı məcburi cərimə tətbiq edilmişdir.
