YENİ AZƏRBAYCAN PARTİYASI PARLAMENT SEÇKİLƏRİNDƏ QƏLƏBƏSİNİ YÜRÜŞ-MİTİNQLƏ QEYD ETDİ
Ümummilli liderimiz Heydər Əiyevin, dahi rəhbərimizin layiqli davamçısı Prezident İlham Əliyevin portretləri, eləcə də əzmlə dalğalanan dövlət bayrağımız mərasimə möhtəşəm bir görünüş verirdi.
Yeni Azərbaycan Partiyasının sədr müavini, icraçı katib Əli Əhmədov mitinqin iştirakçılarını salamlayaraq dedi ki, Azərbaycan seçiciləri parlament seçkilərində YAP-ın namizədlərinə səs verməklə bir daha sabitliyi, əmin-amanlığı və inkişafı dəstəklədiklərini təsdiq etmişlər. Partiyanın növbəti parlament seçkilərində bu möhtəşəm qələbəsi Prezident İlham Əliyevin həyata keçirdiyi siyasətin, quruculuq işlərinin, iqtisadi inkişafın və tərəqqinin xalq tərəfindən müdafiə olunmasını sübut edən inkarolunmaz həqiqətdir.
Çıxış edən digər natiqlər dedilər ki, parlament seçkiləri Azərbaycan xalqının seçib-seçilməklə bağlı yüksək mədəniyyətini bütün dünyaya nümayiş etdirmişdir. Seçicilər azad şəkildə seçki məntəqələrinə gələrək sərbəst surətdə istədikləri namizədlərə səs vermişlər. Seçkilər demokratik, azad, ədalətli və şəffaf şəraitdə başa çatmışdır. On minlərlə insanın mitinqə toplaşması seçicilərin daim Yeni Azərbaycan Partiyası ilə həmrəy olmalarının inkarolunmaz göstəricisidir. Mitinqçilərin hərarətli alqışları bir daha sübut etdi ki, Prezident İlham Əliyevin siyasəti əhali tərəfindən birmənalı olaraq dəstəklənir. Seçicilərin partiyadan olan namizədlərə etimad göstərməsi, ilk növbədə, Prezident İlham Əliyevin şəriksiz qələbəsidir.
Bir saat davam edən yürüş-mitinq atəşfəşanlıqla başa çatdı. Sonda səmaya sülh və əmin-amanlıq rəmzi olan göyərçinlər buraxıldı.
Bölmənin digər xəbərləri
