YENİ AZƏRBAYCAN PARTİYASININ ÜMUMRESPUBLİKA MÜŞAVİRƏSİ KEÇİRİLMİŞDİR
Müşavirəni giriş sözü ilə YAP sədrinin müavini, partiyanın icra katibi, Milli Məclisin deputatı Əli Əhmədov açaraq əldə olunan uğurlardan və qarşıda duran vəzifələrdən danışmış, bildirmişdir ki, ötən 6 ay ərzində partiya üzvlərinin sayı 15 min 677 nəfər artaraq 393 min 746 nəfər olmuşdur. Oktyabrda bələdiyyələrə təkrar, əlavə, yeni və ilk dəfə keçiriləcək seçkilərdə partiyadan olan namizədlərin böyük fəallıqla iştirak edəcəklərindən danışan natiq demişdir ki, ötən dövrdə qazanılan nailiyyətlərdən arxayınlaşmaq olmaz. Seçkilər keçiriləcək şəhər və rayonlarda partiyanın yerli təşkilatları YAP-ın namizədlərinə yaxından kömək göstərməlidirlər.
Müşavirədə bələdiyyələrə təkrar, əlavə, yeni və ilk dəfə keçiriləcək seçkilərə hazırlıq və şəhər, rayon təşkilatlarında növbəti konfransların keçirilməsi ilə bağlı məsələlər müzakirə olunmuşdur.
Qeyd olunmuşdur ki, bələdiyyə seçkiləri keçiriləcək bütün dairələrdən partiyadan olan namizədlər qeydə alınmışdır.
Sentyabrın 2-dən başlayaraq bölgələrdə bələdiyyə üzvlüyünə namizədlərin toplantıları keçiriləcəkdir. Toplantılarda seçkiqabağı təbliğat-təşviqat kompaniyasının səmərəli aparılması üçün tövsiyələr veriləcəkdir.
Yığıncaqda yerlərdə təşkilatlanma işlərini daha da yaxşılaşdırmaq, eləcə də, 2008-ci ildə keçiriləcək prezident seçkilərinə ciddi hazırlaşmaq barədə tapşırıqlar verilmişdir.
Müşavirə öz işini digər təşkilatı məsələlərin müzakirəsi ilə davam etdirmişdir.
Bölmənin digər xəbərləri
