Yens Stoltenberq: Növbəti 10 ildə NATO-nun qalacağına dair zəmanət yoxdur
Bakı, 15 aprel, AZƏRTAC
NATO-nun mövcudluğu “təbiət qanunu” deyil və alyansın növbəti 10 ildə də mövcud olacağına dair heç bir zəmanət yoxdur.
AZƏRTAC xəbər verir ki, NATO-nun sabiq Baş katibi Yens Stoltenberq bu barədə TV2 telekanalına müsahibəsində deyib. ABŞ Prezidenti Donald Trampın hətta ilk səlahiyyət müddəti ərzində Şimali Atlantika Alyansından çıxmaqla hədələdiyini, lakin bu təhdidlərin gerçəkləşmədiyini xatırladan sabiq Baş katib heç kimin belə bir ssenarinin nə vaxt baş verəcəyini dəqiq bilmədiyini vurğulayıb. O, həmçinin hər kəsi ABŞ liderinin bu cür açıqlamalarını ciddi qəbul etməyə çağırıb. Yens Stoltenberq NATO üzvlərinin Donald Trampın ritorikasına deyil, öz hərəkətlərinə diqqət yetirməli olduqlarını söyləyib.
Xatırladaq ki, Donald Tramp əvvəllər də Birləşmiş Ştatların NATO siyasətini çox ciddi şəkildə nəzərdən keçirəcəyini bildirib. Amerika liderinin sözlərinə görə, ABŞ NATO üçün trilyonlarla dollar ödəməsinə baxmayaraq, alyans İranla münaqişədə Vaşinqtona dəstək verməyib.
Bölmənin digər xəbərləri
