Yevlaxda kitab bayramı keçirilmişdir
Yevlax, 7 may (AZƏRTAC). Yevlax şəhərindəki elektron kitabxanada ənənəvi kitab bayramı keçirilmişdir.
AZƏRTAC xəbər verir ki, rayon ziyalılarının, kitabsevərlərin iştirakı ilə keçirilən tədbirdə kitabxananın direktoru Vüsalə Məmmədova, mədəniyyət evinin direktoru Eldəniz Mustafayev, tarix-diyarşünaslıq muzeyinin direktoru Aygün Qasımova və başqaları çıxış edərək bilik mənbəyi olan kitabın əhəmiyyətindən, cəmiyyətin tərəqqisinə, insanın mənəvi aləminə müsbət təsirindən, ölkəmizdə kitabxana-informasiya sahəsinin inkişafına göstərilən dövlət qayğısından danışmışlar. Natiqlər latın qrafikalı kitabların nəşri ilə bağlı həyata keçirilən tədbirlərin əhali tərəfindən razılıqla qarşılandığını diqqətə çatdırmışlar.
Məlumat verilmişdir ki, hazırda rayonun kitabxanalarında 526 min nüsxə kitab vardır. İndiyədək rayonun kitabxana fonduna latın qrafikası ilə nəşr olunmuş 70 min nüsxə kitab verilmişdir.
Kitab bayramında məktəblilərin ifasında ədəbi-bədii kompozisiya nümayiş etdirilmiş, “Dan ulduzu” ədəbi məclisinin üzvləri ulu öndər Heydər Əliyevə və kitaba həsr olunan şeirlər söyləmişlər.
Kitabxanada təşkil olunmuş kitab sərgisi tədbir iştirakçılarında maraq doğurmuşdur.
Bölmənin digər xəbərləri
