Yevlaxda tədbir: “Heydər Əliyev-Zəfərə gedən yolun başlanğıcı”
Yevlax, 18 fevral, AZƏRTAC
Yevlaxda Ümummilli Lider Heydər Əliyevin 100 illiyi münasibətilə “Heydər Əliyev-Zəfərə gedən yolun başlanığıcı” mövzusunda tədbir keçirilib.
AZƏRTAC-ın bölgə müxbiri xəbər verir ki, əvvəlcə müstəqil müasir Azərbaycanın qurucusu Ulu Öndər Heydər Əliyevin və torpaqlarımızın ərazi bütövlüyü uğrunda gedən döyüşlərdə qəhrəmancasına həlak olmuş şəhidlərimizin xatirəsi bir dəqiqəlik sükutla yad edilib.
Tədbirdə çıxış edən Yeni Azərbaycan Partiyası Yevlax rayon təşkilatının sədri Rafiq Əliyev bildirib ki, Ümummilli Lider Heydər Əliyevin vəfatından ötən müddət ərzində bu ada duyulan hörmət və məhəbbət bizlərə dünya miqyasında tanınmış dahi bir şəxsiyyətin həmvətəni olduğumuzun qürurunu yaşadır. Bu gün insanlar tarixi vərəqlədikcə Heydər Əliyev zəkasının, düşüncəsinin, müdrikliyinin böyüklüyünü bir daha hiss edir, Ümummilli Liderin respublikamız, xalqımız üçün misilsiz xidmətlər göstərdiyinin şahidi olurlar. Dahi Heydər Əliyev məhvə doğru gedən Azərbaycanı uçurumun kənarından xilas edib, güclü inkişaf yoluna çıxarmaqla xalqımızın böyük xilaskarına çevrilib. Qədirbilən xalqımız dahi şəxsiyyətin xidmətlərini əsla unutmur, onun xatirəsini ehtiramla yad edib, daim uca tutur.
Diqqətə çatdırılıb ki, 44 günlük Vətən müharibəsində qazandığımız möhtəşəm Qələbə Heydər Əliyev ideyalarının əbədi olaraq yaşadığını bir daha sübuta yetirmiş oldu. Prezident, Ali Baş Komandan İlham Əliyevin peşəkar rəhbərliyi ilə rəşadətli Azərbaycan Ordusunun müstəqil dövlətimizə və xalqımıza qazandırdığı bu tarixi Zəfər məhz Ulu Öndər Heydər Əliyevin müstəqil dövlətçilik ideallarının böyük təntənəsidir.
Yevlax Rayon İcra Hakimiyyətinin başçısı Anar Tağıyev çıxışında Prezident İlham Əliyevin müvafiq Sərəncamı ilə 2023-cü ilin “Heydər Əliyev İli” elan olunmasını, bu münasibətlə ölkəmizin bütün bölgələrində olduğu kimi Yevlaxda da silsilə tədbirlər keçirilməsini diqqətə çatdırıb. Bildirib ki, bu da Azərbaycan xalqının böyük oğlu, unudulmaz parlaq siması olan dahi Heydər Əliyevin şərəfli həyat yolunun, onun siyasi fəaliyyətinin təbliğ olunmasına xidmət göstərir. Ulu Öndər Heydər Əliyev Azərbaycan xalqının qurtuluşuna imza atan, dövlətimizi məhv olmaq təhlükəsindən xilas edən dahi şəxsiyyətdir. Ötən zaman kəsiyində Ulu Öndər Heydər Əliyev kimi nadir siyasətçinin xalqı və ölkəsi üçün etdikləri, canı, həyatı bahasına nail olduğu işlər, göstərdiyi xidmətlər bir-bir gözlərimizin önündən keçir. Bu xidmətlər o qədər böyükdür, bu işlər o qədər ölçüyəgəlməzdir ki, bütün bunları bir yazıya sığdırmaq, bir yazıda əhatə etmək imkansızdır. Xalqının qurtuluşuna imza atan, ölkəsini parçalanmaq, dünya xəritəsindən yox olmaq təhlükəsindən qurtaran Ulu Öndərimiz Heydər Əliyev olmasa idi məhz bugünkü müstəqil Azərbaycan da var olmayacaqdı. Bu gün Ümummilli Liderin müdrik, əbədiyaşar ideyaları dövlətimizin başçısı, Prezident İlham Əliyevin düzgün və məqsədyönlü siyasətində əks olunur. Biz 2003-cü ildən bu günədək keçilən yola nəzər salsaq Ümummilli Liderin siyasi kursunun uğurla davam etdiyini görərik. Prezident İlham Əliyev qısa bir müddətdə ölkəmiz naminə saysız-hesabsız uğurlara imza atdı. Zəfər Zirvəsi olan, möhtəşəm Qələbə ilə nəticələnən 44 günlük Vətən müharibəsi şanlı tariximiz oldu. O uğurlar böyük qələbələrin estafeti kimi bu gün də davam edir və xalqımızı xoşbəxt gələcəyə doğru aparır.
Vurğulanıb ki, dahi Heydər Əliyevin və Zəfər yolunda qəhrəmanlıq göstərmiş igid oğullarımızın əziz xatirəsi Azərbaycan xalqının qəlbində əbədi olaraq yaşayacaqdır. Prezident, Müzəffər Ali Baş Komandan İlham Əliyevin dəfələrlə bəyan etdiyi kimi, Azərbaycan bütün nailiyyətlərinin, zəfərlərinin təməlində xalqımızın bu günü və gələcəyi üçün yeganə düzgün yolu nurlandıran Heydər Əliyev siyasəti dayanır. Məhz bu siyasət müsəqilliyimizin və inkişafımızın əbədi rəhnidir.
Daha sonra mövzu ətrafında söhbət aparılıb. Şəhid ailələrinin nümayəndələri əvvəlki dövrlə müqayisədə bugünkü Azərbaycanın daha güclü, daha qüdrətli olduğunu diqqətə çatdırmaqla, bildiriblər ki, müstəqil Azərbaycan məhz Ulu Öndər Heydər Əliyevin xalqımıza əmanət etdiyi ən böyük mirasdır. Bizim övladlarımız bu mirası qorumaq, saxlamaq üçün Vətən uğrunda canlarını fəda edərək, ən yüksək mərtəbəyə-şəhidlik zirvəsinə ucalıb. Prezident, Müzəffər Ali Baş Komandan İlham Əliyevin rəhbərliyi ilə bu gün ölkəmizdə sabitlik hökm sürür, insanlar firavan yaşayır.
Şəhid ailəsinin nümayəndələri onlara göstərilən xüsusi diqqət və qayğıya görə Prezident, Müzəffər Ali Baş Komandan İlham Əliyevə və Birinci vitse-prezident Mehriban xanım Əliyevaya minnətdarlıq hissini ifadə edib, daim Ulu Öndər ideyalarına əsaslan bu müdrik siyasətin ətrafında sıx birləşdiklərini diqqətə çatdırıblar.
Bölmənin digər xəbərləri
