Y.Kifu: Çin-Rusiya strateji tərəfdaşlığı fonunda casusluq iddiaları güclənir
Buxarest, 25 oktyabr, AZƏRTAC
Rumıniyanın nüfuzlu “Calea Europeana” nəşrində Rumıniyanın tanınmış siyasi analitiki, Rumıniya Prezidentinin sabiq müşaviri Yulian Kifu Çin və Rusiya münasibətlərini təhlil edib. O qeyd edib ki, Çin və Rusiya arasında imzalanmış “hədsiz strateji tərəfdaşlıq” münasibətləri formal səviyyədə yaxın olsa da, əslində, genişmiqyaslı casusluq və kiberinfiltrasiya fəaliyyətlərinə şərait yaradır.
Y.Kifu yazır ki, son illərdə Pekin və Moskva arasında sarsılmaz görünən əməkdaşlıq yeni strateji tərəfdaşlıq modelinə əsaslansa da, bu münasibətlərin arxa planında Çin xüsusi xidmət orqanlarının Rusiyada mühüm obyektlərə, o cümlədən hərbi və texnoloji infrastruktura nüfuz etdiyi faktlar yer alır.
Onun fikrincə, Çin Rusiya üçün bazar, resurs və texnologiya mənbəyi kimi mühüm rol oynayır, Moskva isə Pekindən həm maliyyə dəstəyi, həm də geosiyasi manevr imkanları əldə edir. Lakin bu əməkdaşlıq tam etimada əsaslanmır — qarşılıqlı şübhələr və casusluq halları əlaqələri mürəkkəbləşdirir.
Məqalədə qeyd olunur ki, Çin xüsusi xidmət orqanları sadəcə məlumat toplamaqla kifayətlənmir, eyni zamanda, Rusiyada uzunmüddətli strateji məqsədlər üçün sabit şəbəkələr qurur. “Bu əməkdaşlıq sadəcə simvolik deyil, Çin özünü Rusiya ərazisində texnoparklar, kiberinfrastruktur və informasiya sistemləri vasitəsilə möhkəmləndirir”, — deyə Y.Kifu bildirir.
Analitikə görə, bu prosesin nəticələri xüsusilə Avropa üçün ciddi strateji təhlükələr yaradır. Rusiya-Çin tərəfdaşlığı enerji, təhlükəsizlik və kibermühit sahələrində yeni çağırışlar deməkdir.
Müəllif vurğulayır ki, Avropa bu hibrid təhdidlərin real miqyasını anlamalı və koordinasiyalı cavab mexanizmləri formalaşdırmalıdır. Onun sözlərinə görə, Çin-Rusiya tərəfdaşlığı haqqında səslənən “sarsılmaz ittifaq” tezislərinin arxasında strateji casusluq və gizli rəqabət mövcuddur.
Buxarest
Bölmənin digər xəbərləri
