ZAQATALA RAYON İCRA HAKİMİYYƏTİNİN BAŞÇISI ASİF ƏSGƏROVUN ÇIXIŞI
-Möhtərəm cənab Prezident!
Hörmətli xanımlar və cənablar!
Bildiyiniz kimi, Zaqatala çox füsunkar gözəlliyə və zəngin təbii ehtiyatlara malik olan qızılgüllər diyarıdır. Ulu öndər Heydər Əliyevin respublikamıza ilk dəfə rəhbərlik etdiyi dövrdə - ötən əsrin 70-80-ci illərində Zaqatalanın siması əsaslı şəkildə dəyişmiş, rayon sosial-iqtisadi tərəqqi yoluna qədəm qoymuşdur. Məhz həmin dövrdə rayonda kənd təsərrüfatının gülçülük, çayçılıq, tütünçülük, meyvə-tərəvəzçilik, heyvandarlıq kimi sahələri sürətlə inkişaf etmiş, iri emal müəssisələri, o cümlədən respublikada yeganə “Efir yağları” zavodu, ətriyyat-kosmetika fabriki yaradılmışdır. Zaqatala ümumittifaq turizm marşrutuna daxil olaraq bütün sahələrdə intibah dövrünü yaşamağa başlamışdır.
Ölkəmizdə sonralar iqtisadi dağıntılarla müşahidə olunan anarxiya Zaqataladan da yan keçməmiş, məhz ulu öndərimizin ikinci dəfə hakimiyyətə qayıdışından sonra sosial-iqtisadi inkişaf sahəsindəki tənəzzülün qarşısı alınmış, rayonumuz yenidən davamlı inkişaf yoluna qədəm qoymuşdur.
Cənab Prezident! Son illər Sizin həyata keçirdiyiniz islahatların, respublikamızın bütün bölgələrində icra olunan böyük proqram və layihələrin nəticəsidir ki, insanlarda ruh yüksəkliyi yaranmış, onlar hər bir sahənin tərəqqisinin ölkəmiz üçün nə qədər vacib olduğunu hiss etmişlər. İndi rayonumuzda tikinti-quruculuq və abadlıq işləri geniş vüsət almışdır. Hər bir zaqatalalı torpağa bərk bağlıdır. Onlara yenidən qurub-yaratmaq, əkib-becərmək, məhsul toplamaq əhval-ruhiyyəsini, cənab Prezident, Siz vermisiniz.
Zaqatalada tütün istehsalının həcmi 4 dəfə, çayçılıq və gülçülük məhsullarının istehsalı isə 3 dəfədən çox artmışdır. Ötən 4 il ərzində çoxlu emal müəssisələri, o cümlədən 24 fındıq, 3 tütün, 1 qızılgül yağı və 2 çay emalı müəssisəsi fəaliyyətə başlamışdır. Eyni zamanda, rayonda yeni süd emalı və tütün istehsalı zavodlarının tikintisinə başlanılmışdır. Bu müəssisələr rayon iqtisadiyyatının inkişafına təkan verməklə yanaşı, yüzlərlə yeni iş yerinin açılmasına imkan yaradacaqdır. İş yerləri yalnız kənd təsərrüfatı ilə bağlı sahələrdə deyil, sənayenin digər sahələrində yeni müəssisələrin inşası hesabına xeyli artmışdır. Son dörd ildə Dövlət proqramının icrası ilə bağlı ayrı-ayrı sahələr üzrə 300-dən artıq layihə həyata keçirilmişdir. Görülən işlərin nəticəsində dörd ildə rayonda 9272 yeni iş yeri açılmışdır ki, bunun da 5104-ü daimidir. Təkcə 2007-ci ildə 3687 yeni iş yeri yaradılmışdır.
Hörmətli konfrans iştirakçıları!
Zaqatala respublikamızın dağlıq rayonlarından biridir. Son illər dağ çaylarının daşması və sel suları nəticəsində əkin sahələrinə, meşələrə və yaşayış massivlərinə vurulan ziyanın qarşısını almaq məqsədi ilə bəndlər tikilmiş, sahilbərkitmə işləri görülmüşdür. Rayon əhalisinin içməli suya olan tələbatını ödəmək üçün su və qaz xətləri çəkilmiş, artezian quyuları qazılmış, yollar abadlaşdırılmış, enerjinin verilməsində fasilələr aradan qaldırılmışdır. Uzun illər gediş-gəlişdə çətinliklərlə üzləşən rayon əhalisinin rahatlığını təmin etmək üçün 6 körpü tikilib istifadəyə verilmişdir.
Cənab Prezident, Siz hər zaman abadlıq-quruculuq işlərinin yüksək keyfiyyətlə, ən müasir səviyyədə aparılmasını vacib tələb kimi bizim qarşımıza qoyursunuz. Məlumat vermək istəyirəm ki, artıq Zaqatalada müasir asma körpünün inşasına başlanılmışdır.
Cənab Prezident, Sizin təməlini qoyduğunuz Diaqnostika Mərkəzində hazırda tamamlama işləri aparılır, Zaqatala hava limanının tikintisi də başa çatmaq üzrədir. Şübhəsiz ki, bu hava nəqliyyatı regionda insanların gediş-gəlişini yaxşılaşdırmaqla yanaşı, ölkəmizin Şimal-Qərb bölgəsində daxili və xarici turizmin inkişafına da təkan verəcəkdir. Artıq insanlarda turizmin inkişafına maraq xeyli artmışdır. Elə bunun nəticəsidir ki, rayonumuzda ailə turizmi inkişaf etmiş, iş adamları tərəfindən turizm komplekslərinin, mehmanxanaların tikintisinə başlanmışdır.
İnsanların rifahının yüksəlməsinin əsas göstəricilərindən biri də budur ki, son illərdə rayonda 500-ə yaxın fərdi ev tikilmişdir. Cənab Prezident, onu da qeyd etmək istərdim ki, indi tikilən evlər 5-10 il bundan əvvəl tikilən evlərdən deyil. Sizin müasirlik, yenilik ideyalarınız, artıq adi insanların da təfəkkürünə sirayət etmiş, evlər nəinki şəraiti və rahatlığı baxımından, hətta arxitektura görkəmi ilə də seçilir.
Cənab Prezident, Siz Qarabağ müharibəsi əlilləri və şəhid ailələrini də diqqətdən kənarda qoymursunuz. Hazırda onlar üçün inşa olunan 104 mənzildən ibarət 3 yaşayış binasında tikinti-quraşdırma işləri başa çatmaq üzrədir. Bu binalar da ən müasir standartlara cavab verir.
Rayonumuzda təhsil müəssisələrinin sayı xeyli artmışdır. Son iki ildə Heydər Əliyev Fondunun “Yeniləşən Azərbaycana yeni məktəb” proqramı çərçivəsində 8 yeni məktəb binası tikilmiş, 17 məktəb və məktəbəqədər müəssisə əsaslı təmir olunmuş, müasir inventar və avadanlıqla təmin edilmişdir. Hazırda 3 orta məktəb, internat məktəbi və məktəbəqədər müəssisənin tikintisinə başlanmışdır. Göstərdiyi diqqət və qayğıya görə Heydər Əliyev Fondunun Prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevaya Zaqatala ictimaiyyəti adından dərin təşəkkürümüzü bildirirəm.
Hörmətli konfrans iştirakçıları!
Bildiyiniz kimi, Zaqatala zəngin etnik tərkibə malik bölgədir. Burada 20-dən çox millətin və etnik qrupun nümayəndələri dostluq və qardaşlıq şəraitində yaşayırlar. Rayonumuza gələn hər bir qonaq yeni istehsal müəssisələri, mədəniyyət, təhsil və səhiyyə obyektləri ilə tanış olur, Sizin apardığınız siyasətin bariz nümunəsini görür. Elə bu yaxınlarda Dağıstandan gələn nümayəndə heyəti də respublikamızın sürətli inkişafına heyran qalmış, Zaqatalanın ucqar kəndi olan Suvagildəki mədəniyyət evində “Saxur” folklor ansamblının çıxışlarına baxmış və onlara yaradılan şəraitdən sevinclərini gizlədə bilməmişlər.
Möhtərəm cənab Prezident!
İcazə verin, çıxışımın sonunda bütün Zaqatala sakinləri adından Sizi əmin edim ki, biz ölkəmizdə həyata keçirdiyiniz möhtəşəm quruculuq işlərində bundan sonra da yaxından iştirak edəcək, müstəqil Azərbaycanımızın inkişafı naminə üzərimizə düşən bütün vəzifələri layiqincə yerinə yetirəcəyik.
Diqqətinizə görə çox sağ olun.
Bölmənin digər xəbərləri
