Zaqatalada sonuncu zəlzələ zamanı tikililərə dəymiş ziyan dəqiqləşdirilir
Zaqatala, 15 oktyabr (AZƏRTAC). Zaqatala rayonunda oktyabrın 14-də baş vermiş sonuncu zəlzələ zamanı fərdi evlərə, məktəb binalarına və digər sosial obyektlərə dəymiş ziyanın müəyyənləşdirilməsi məqsədi ilə aidiyyəti qurumlar tərəfindən yerlərdə araşdırmalar davam etdirilir.
Rayon Fövqəladə Hallar Komissiyasından AZƏRTAC-a bildirmişlər ki, sonuncu yeraltı təkanlar rayonun 51 yaşayış məntəqəsində müəyyən fəsadlar törətmişdir. Rayonun Dombabinə, Faldarlı və Aşağı Tala kəndlərində 15 fərdi evin divarı uçmuş, evlər qəzalı vəziyyətə düşmüşdür. Bundan əlavə, mayda baş vermiş əvvəlki zəlzələlər zamanı Fövqəladə Hallar Nazirliyinin (FHN) işçi qrupları tərəfindən bərpa-gücləndirmə və təmirə ehtiyacı olduğu müəyyənləşdirilən 3 minə yaxın fərdi ev yenidən zərər görmüş, divarlardakı çatlar böyümüşdür. Yeraltı təkanlar nəticəsində Faldarlı, Qandax, Uzun Qazmalar, Yolayrıc, Mosul kəndlərində məktəb binalarında təhlükəli çatlar əmələ gəlmişdir. Əvvəlki zəlzələlər zamanı zərər görmüş Danaçı kənd 1 saylı və Aşağı Tala kənd 3 saylı orta məktəblərin binaları qəzalı vəziyyətə düşdüyü üçün bu təhsil obyektlərinin fəaliyyəti dayandırılmışdır. Bundan əlavə, baş verə biləcək təhlükəni nəzərə alaraq, rayondakı uşaq bağçaları da FHN-in işçi qrupları tərəfindən rəy verilənədək qeyri-müəyyən müddətə bağlanmışdır.
Bölmənin digər xəbərləri
