Zəfər Günü Praqada da təntənə ilə qeyd edilib
Praqa, 7 noyabr, AZƏRTAC
8 Noyabr - Zəfər Günü münasibətilə Azərbaycanın Çex Respublikasındakı səfirliyi tərəfindən Praqa şəhərində təntənəli mərasim keçirilib.
AZƏRTAC xəbər verir ki, mərasimdə Çexiyanın ictimai-siyasi, elmi və işgüzar dairələrinin nümayəndələri, Praqada akkreditə olunmuş diplomatik korpusun rəhbərləri və əməkdaşları, media nümayəndələri və diaspor təşkilatlarının təmsilçiləri olmaqla, ümumilikdə 100-dək qonaq iştirak edib.
Azərbaycanın Dövlət Himni səsləndirildikdən sonra çıxış edən səfir Yaşar Əliyev Prezident, Ali Baş Komandan İlham Əliyevin rəhbərliyi ilə 44 günlük Vətən müharibəsində müzəffər Ordumuzun cəbhədə misilsiz şücaət göstərərək, əzəli torpaqlarını işğaldan azad etdiyini bildirib. Səfir xalqımızın milli qürur tarixi olan 8 Noyabr - Zəfər Gününün müasir tariximizdə müstəsna əhəmiyyətindən danışıb, beş il əvvəl Azərbaycanın torpaqlarını işğaldan azad etməklə təkcə özünün ərazi bütövlüyünü deyil, həmçinin tarixi ədaləti bərpa etdiyini, beynəlxalq hüququn norma və prinsiplərini yerinə yetirdiyini diqqətə çatdırıb.
Bu il avqustun 8-də Vaşinqtonda, Ağ Evdə ABŞ Prezidenti Donald Trampın iştirakı ilə Azərbaycan Prezidenti və Ermənistanın Baş naziri tərəfindən Birgə Bəyannamənin imzalanmasının fundamental vacibliyini vurğulayan səfir, Prezident İlham Əliyevin apardığı siyasi kursun mehriban qonşuluq, regional əməkdaşlıq formatlarının yaradılması kimi prinsiplər üzərində qurulduğunu diqqətə çatdırıb.
Səfir, hazırda regionumuzda yeni reallıqların yarandığını, sülh və sabitliyin möhkəmləndirilməsi, bölgənin yeni inkişaf mərhələsinə qədəm qoyması üçün əlverişli zəminin yarandığını vurğulayaraq, işğaldan azad olunmuş ərazilərdə yenidənqurma və bərpa işləri, habelə əhəmiyyətli infrastruktur layihələri həyata keçirən Azərbaycanın regionda sülh və əməkdaşlığı təşviq etdiyini bildirib.
Prezident İlham Əliyevin Azərbaycanın işğaldan azad edilmiş bütün ərazilərini yaşıl enerji zonası elan etdiyini, bu ərazilərdə genişmiqyaslı quruculuq işlərinin aparıldığını vurğulayan səfir, azad edilmiş ərazilərin iqtisadi potensialının reallaşması istiqamətində cəmi 5 il ərzində dayanıqlı nəqliyyat infrastrukturunun yaradıldığını, beynəlxalq hava limanlarının inşa edildiyini, “ağıllı şəhər” və “ağıllı kənd” konsepsiyalarından istifadə edilməklə yeni yaşayış məntəqələrinin istifadəyə verildiyini bildirib. O, onilliklər ərzində fundamental hüquqları pozulan azərbaycanlı məcburi köçkünlərin artıq təhlükəsiz şəkildə öz doğma yurdlarına geri döndüklərini diqqətə çatdırıb.
Sonra tədbirdə Türkiyə səfiri Metin Feyzioğlu, Pakistan səfiri Şehryar Akbar Xan və Macarıstanın səfiri Andras Baranyi çıxış ediblər. Səfirlər çıxışlarında, təmsil etdikləri ölkələrin Azərbaycan ilə dost münasibətlərinə toxunaraq, Vətən müharibəsində qələbənin qəhrəmancasına mübarizə nəticəsində qazanıldığını vurğulayıb, Zəfər Günü, suverenliyin və ərazi bütövlüyünün bərpası münasibətilə Azərbaycan xalqına təbriklərini çatdırıblar.
Sonra 44 günlük Vətən müharibəsi və ölkəmizin hərbi qüdrəti, işğaldan azad olunmuş ərazilərdə yenidənqurma və bərpa işləri barədə videoçarxlar nümayiş etdirilib, milli mətbəximizin nümunələrindən ibarət ziyafət təşkil olunub. Həmçinin 8 Noyabr - Zəfər Günü ilə əlaqədar səfirlik tərəfindən xüsusi hazırlanmış broşürlər və İRS jurnalının müvafiq buraxılışları tədbir iştirakçılarına paylanılıb.
Vüqar Seyidov
AZƏRTAC-ın xüsusi müxbiri
Praqa
Bölmənin digər xəbərləri
