Zelenski: Ukraynaya 29 raket və 480 dron atılıb
Kiyev, 7 mart, AZƏRTAC
Rusiyanın ballistik raket zərbəsindən sonra Xarkovda yaşayış binasının dağıntılarını təmizləmək üçün işlər görülür. Giriş zalı dağılıb, qonşu binanın yuxarı mərtəbələri isə zədələnib. Təəssüf ki, hazırda 7 nəfərin öldüyü məlumdur. Uşaqlar da daxil olmaqla, on nəfərdən çox insan yaralanıb. Dağıntılar altında daha çox insan qala bilər. Hadisə yerində bütün lazımi xilasetmə xidmətləri işləyir.
AZƏRTAC xəbər verir ki, bu barədə Ukraynanın Prezidenti Volodimir Zelenski Teleqram səhifəsində məlumat verib.
Prezidentin sözlərinə görə, Rusiya Ukraynaya qarşı təxminən yarısı ballistik raketlər olan 29 raket və əksəriyyəti "Şahed" olan 480 dron atıb. Onlar Kiyevdəki enerji obyektlərini, Xmelnitski və Çernovtsi bölgələrini və Jitomir bölgəsindəki dəmir yolunu hədəfə alıb. Dnepr, Zaporojye, Vinnitsa, Odessa, Poltava, Sumı və Çerkassı bölgələrində ziyan qeydə alınıb.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
