Zərdabda azərbaycanlıların soyqırımına həsr olunmuş mərasim keçirilmişdir
Zərdab, 1 aprel (AZƏRTAC). XIX əsrin əvvəllərindən başlayaraq məqsədli şəkildə Cənubi Qafqaza köçürülən ermənilər havadarlarının köməyi ilə Azərbaycan türklərinin yaşadıqları minlərlə yaşayış məntəqəsini viran etmiş, bir milyondan artıq soydaşımızı soyqırımına məruz qoymuşlar. Azərbaycan xalqına qarşı yönəldilən erməni təcavüzünün başlıca məqsədi müxtəlif üsul və vasitələrdən, tarixin saxtalaşdırılmasından, siyasi təxribatlardan, ümumiyyətlə isə hər cür çirkin əməllərdən istifadə edərək Azərbaycan torpaqları hesabına erməni dövlətinin əsasını qoymaq və onu genişləndirərək “Böyük Ermənistan” yaratmaqdan ibarət olmuşdur. Bu niyyətin reallaşmasında ermənilərin maraqları o vaxt çar Rusiyasının Qafqazdakı maraqları ilə üst-üstə düşürdü. Təəssüf ki, bu gün Rusiya və bəzi Qərb dövlətləri bu məsələdə yenə də maraqlıdırlar və hələ də ikili standartlar siyasəti yürüdürlər.
Bu sətirlər Zərdabda 31 mart-Azərbaycanlıların soyqırımına həsr olunmuş mərasimdə səsləndirilmişdir. İctimayyətin çoxsaylı nümayəndələrinin qatıldığı mərasimdə çıxış edən rayon icra hakimiyyətinin başçısı Lütvəli Babayev daha sonra tarixə qısa nəzər salaraq 1813-ci ildə “Gülüstan” və 1828-ci ildə “Türkmənçay” müqavilələrindən sonra İran və Türkiyədən 130 min nəfərə yaxın erməninin kütləvi sürətdə İrəvan, Naxçıvan və Qarabağ xanlıqları ərazilərinə köçürülərək məskunlaşdırıldığını, bu zaman azərbaycanlıların dədə-baba torpaqlarından sıxışdırılaraq çıxarıldığını diqqətə çatdırmışdır.
1828-ci il martın 21-də rus imperatoru I Nikolayın İrəvan və Naxçıvan xanlıqlarının əraziləri hesabına “Erməni vilayəti” yaradılması barədəki fərmanı artıq Azərbaycan türkləri üçün gələcək dəhşətli günlərə rəvac vermişdir. XX əsrin əvvəllərindən başlayaraq ermənilər xalqımıza qarşı etnik təmizləmə siyasəti yetirməyə başlamışdır. “Daşnaksütyun” partiyası öz proqramında dəyişiklik edərək Qafqazda müstəqil erməni dövləti yaratmaq məqsədilə silahlı birləşmələr təşkil etmişdir. 1905-1907-ci illərdə Rusiyada baş verən inqilabi proseslərdən istifadə edən ermənilər soyqırımı siyasətinin birinci mərhələsini həyata keçirməyə başlamışlar. Belə ki, onlar Bakıda, sonra isə İrəvanda, Naxçıvanda, Gəncədə, Qarabağda, Qazaxda və Tiflisdə dinc azərbaycanlılara qarşı kütləvi qətliamlar törətmişlər. On min nəfərdən artıq silahlı erməni birləşmələri təkcə Şuşa, Cavanşir, Cəbrayıl və Qazax qəzalarında kütləvi qırğınlar törədərək 200-dən çox Azərbaycan kəndini viran etmiş, on mindən artıq soydaşımızı qətlə yetirmişlər.
Sonra mərasimdə birinci dünya müharibəsi zamanı, habelə Azərbaycanlıların soyqrımının növbəti mərhələləri olan 1918-1920, 1948-1953, 1988-1994-cü illərdə erməni daşnaklarının törətdikləri vəhşiliklər barədə tarixi həqiqətlərdən ətraflı danışılmışdır.
Mərasimdə təəssüflə qeyd olunmuşdur ki, azərbaycanlıların soyqırımı ilə bağlı bütün məlumatlar uzun müddət dünya ictimayyətindən gizlədilmiş və ya təhrif olunmuş şəkildə təqdim edilmişdir. Məlum olduğu kimi, Xocalı faciəsi və digər kütləvi qətliamlar, etnik təmizləmə, Dağlıq Qarabağ və ətraf rayonların işğalı faktları ilə bağlı BMT Təhlükəsizlik Şurasının 4 qətnaməsinin heç biri yerinə yetirilməmişdir.
Mərasimdə belə bir fikir vurğulandı ki, xalqımıza qarşı planlı sürətdə aparılan soyqırımı və etnik təmizləmə siyasəti milli tariximizin faciəli səhifələrindən biri kimi yaddaşımızda daim yaşayacaq, torpaqlarımızın bütövlüyünün təmin olunmasınada hər kəsi mübarizəyə səsləyəcəkdir. Bu istiqamətdə Prezident İlham Əliyevin rəhbərliyi ilə həyata keçirilən ardıcıl və məqsədyönlü siyasət gec-tez torpaqlarımızın azad edilməsi, qaçqınların dədə-baba yurdlarına qayıtması, beləliklə də haqq-ədalətin bərpası ilə nəticələnəcəkdir.
Bölmənin digər xəbərləri
