Zimbabve hakimiyyəti azı 50 filin güllələnməsinə icazə verib
Bakı, 4 iyun, AZƏRTAC
Zimbabve hakimiyyəti təbii yaşayış mühitinin təmin edə biləcəyindən üç dəfə çox filin yaşadığı qoruqda ən azı 50 filin güllələnməsinə icazə verib.
AZƏRTAC xəbər verir ki, Zimbabve Milli Parklar və Vəhşi Təbiət İdarəsinin bəyanatında ölkənin cənubundakı Seyv-Velli qoruğunda təxminən 2550 filin yaşadığı halda həmin ərazinin “tutumunun” cəmi 800 fil olduğu bildirilir.
“Reuters” agentliyi yazır ki, son beş ildə buradan artıq 200 fili digər qoruqlara köçürülüb ki, bu heyvanların populyasiyasına nəzarət etmək mümkün olsun.
Vurulmuş heyvanların əti yerli sakinlərə ərzaq kimi paylanacaq, fil dişi isə park administrasiyasına təhvil veriləcək.
Zimbabve dünyada ən böyük fil populyasiyalarından birinə sahibdir. İqlim dəyişikliyi isə insanla vəhşi təbiət arasında qarşıdurmanı daha da kəskinləşdirib, belə ki, fillər qida və su axtarışında insanların yaşadığı ərazilərə soxulurlar.
Keçən il bu Cənubi Afrika dövləti daha 200 filin vurulmasına icazə vermişdi. Həmin vaxt hakimiyyət bildirmişdi ki, vurulan heyvanların əti regional quraqlıqdan daha çox əziyyət çəkən icmalar arasında paylanacaq. Bundan az sonra Namibiya da eyni addımı atacağını açıqlamışdı.
Bölmənin digər xəbərləri
