Tokio, 25 fevral, AZƏRTAC

Yaponiyada fəaliyyət göstərən Azərbaycan-Yaponiya Dostluq Mərkəzi sosial şəbəkələrdə Xocalı soyqırımının 25-ci ildönümü ilə əlaqədar yapon dilində məlumatlar yayıb.

Mərkəzin sədri, Dünya Azərbaycanlılarını Əlaqələndirmə Şurasının üzvü Xəlil Kələntər AZƏRTAC-ın Yaponiyadakı xüsusi müxbirinə bildirib ki, faciədən 25 il keçməsinə baxmayaraq, yapon dilində mənbələrin azlığı səbəbindən yapon ictimaiyyəti erməni silahlıları tərəfindən törədilən bu qanlı cinayət barədə kifayət qədər məlumatlı deyil. Bunu aradan qaldırmaq üçün Yaponiyada yaşayan Azərbaycan diasporunun üzvləri belə informasiya mənbələrində faciə barədə obyektiv məlumatların yerləşdirilməsi təşəbbüsü ilə çıxış ediblər. Faciə haqqında məlumatlar Prezident Administrasiyasının ictimai-siyasi məsələlər şöbəsi və AZƏRTAC-ın birgə layihəsi olan “Xocalı-XX əsrin soyqırımı” kitabından götürülüb. Təşkilatın fəallarının yapon dilində hazırladığı məlumatlar ilk dəfə olaraq Wikipedia onlayn ensiklopediyasında, Yaponiyada yaxşı tanınan “Azerbaijan”, “Azerbaijan Japan Friendship Center”, “Japan&Azerbaijan”, eyni zamanda, Azərbaycanın bu ölkədəki səfirliyinin sosial şəbəkələrdəki səhifələrində geniş yayılıb.

Məlumatlarda Ermənistan-Azərbaycan, Dağlıq Qarabağ münaqişəsi ilə bağlı həqiqətlər, 1992-ci il fevralın 25-dən 26-a keçən gecə erməni təcavüzkarlarının Azərbaycanın Xocalı şəhərində dinc əhaliyə qarşı törətdikləri soyqırımı, həmçinin Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət!” kampaniyası çərçivəsində görülən işlər əksini tapıb.

Qeyd edilir ki, 1992-ci il fevralın 25-dən 26-na keçən gecə törədilmiş Xocalı qətliamı Dağlıq Qarabağ münaqişəsi zamanı öz qəddarlığı ilə seçilən ən dəhşətli, qanlı hadisədir. Faciə zamanı 106-sı qadın, 63-ü uşaq, 70-i qoca olmaqla, 613 nəfər dinc sakin xüsusi qəddarlıqla qətlə yetirilib. Keçmiş sovet ordusunun 366-cı motoatıcı alayının dəstəyi ilə erməni silahlı qüvvələri şəhəri tərk etməyə çalışan mülki əhaliyə qarşı hücuma keçərək onlarla amansız davranıb. Həmin müdhiş gecədən 25 il keçməsinə baxmayaraq, bu cinayəti törədənlərdən heç biri hələ də beynəlxalq məhkəmə qarşısında cavab verməyib.

Məlumatlarda vurğulanır ki, Azərbaycan rəhbərliyinin məqsədyönlü siyasəti və Heydər Əliyev Fondunun vitse-prezidenti Leyla Əliyevanın səyləri nəticəsində Xocalı faciəsi beynəlxalq səviyyədə soyqırımı kimi tanınmaqdadır. Artıq dünyanın bir çox ölkələri, o cümlədən ABŞ-ın 20-dən çox ştatı parlament səviyyəsində Xocalı faciəsini soyqırımı kimi tanıyıb.

Bildirilir ki, Azərbaycan ərazilərinin işğal altında qalması ilə heç vaxt barışmayacaq. Əgər düşmən işğal etdiyi ərazilərdən sülh yolu ilə çıxmasa, Azərbaycan Ordusu buna silah gücünə nail olmağa hazırdır.

Məlumatlarda faciənin 25-ci ildönümü ilə bağlı dünyanın müxtəlif yerlərində soydaşlarımız tərəfindən təşkil edilən aksiyalar barədə də söz açılır, soyqırımı əks etdirən fotolar təqdim olunur.

Vüqar Ağayev

AZƏRTAC-ın xüsusi müxbiri

Tokio