Cəlilabad, 5 iyul, İsmayıl Cəfərli, AZƏRTAC

Respublikanın iri taxılçılıq rayonu olan Cəlilabadda kütləvi taxıl biçini kampaniyası davam edir. Sahələrdə bol məhsul yetişdirilib. İndi əsas vəzifə məhsulu tez və itkisiz toplamaqdır.

AZƏRTAC xəbər verir ki, Cəlilabad rayonunun taxılçıları builki taxıl biçininə uğurla başlayıblar. Rayon Dövlət Aqrar İnkişaf Mərkəzindən aldığımız məlumata görə, torpaq mülkiyyətçiləri bu il 66 min 570 hektar sahədə taxıl bitkiləri becəriblər. Onun 56 min 500 hektarı buğda, 5 min 200 hektarı arpa, 4870 hektarı isə vələmir bitkisidir. Düzgün aqrotexniki qulluq sayəsində zəmilərdə bol məhsul yetişib. Artıq arpa sahələrində biçin yekunlaşıb, buğda sahələrinin isə bu günədək 53 min 57 hektarından 132 min 118 ton məhsul tədarük olunub. Sahibkar Vasif Əmirov deyir ki, dövlətin aqrar sahəyə ayırdığı diqqət zəmilərdə canlanma yaradıb: “Bu sahədə hardasa 30 hektara yaxın zirvə 85 sortu əkmişik, bu elit sortu kimi əkilib. Hazırda bura biçilib. Bunun əsas səbəbləri odur ki, bu gün bizim respublikamızda texniki təminat, innovasiyalar yeni texnologiyaların tətbiqi ilə bağlı çox gözəl işlər görülübdür və gözəl nəticələr də göz qabağındadadır. Kənd təsərrüfatı naziri bizə gübrə, dərman preparatları və alaq otlarına qarşı herbisitlərlə təmin edib və dövlət tərəfindən təminat olunduğu üçün və rahat biz bu işləri görə bilirik”.

Fərdi təsərrüfatlarındakı buğda sahələrindən 45-50 sentner məhsuldarlıq əldə edən fermerlər də var. Ümumilikdə isə rayon üzrə hər hektardan orta hesabla arpadan 21,9 sentner, buğdadan isə 25 sentner məhsul götürülür. Sahibkar Vasif Əmirov bildirir ki, ölkənin etibarlı ərzaq təminatına nail olunmasında taxılçılıq strateji əhəmiyyət daşıyır. Taxılçılıqda məhsuldarlığı artırmaq üçün zəruri amillərdən biri də yeni taxıl sortlarının yaradılması, onların rayonlaşdırılması, eləcə də toxumçuluğun inkişafı ilə bağlıdır: “Hazırda bu sahədən 50-60 sentnerə qədər məhsul gözlənilir. Sağ olsun bizə bu şəraiti yaradan ölkə rəhbərliyi, kənd təsərrüfatı naziri. Amma bir dənə istəyimiz, arzumuz ondan ibarətdir ki, bizim suvarma sistemləri də yenidən qurulsun və biz daha yüksək nailiyyətlər əldə edək. Çünki, aqranomiyada bir şüar var aqrotexniki tədbirlər optimal müddətdə həyata keçirilirsə oradan yaxşı nəticə əldə etmək olar. Yəni vaxtında və zamanında işləri görməliyik, texniki tədbirləri suvarmasını, dərmanlanmasını, gübrə məsələsini vaxtında etməsək onda biz heç nə əldə edə bilmərik. Mən arzu edirəm ki, ölkənin inkişafında mühüm rol oynayacaq suvarma sahəsində yeni islahatlar aparılsın”.

Hazırda Cəlilabad rayonunun Muğan hissəsində biçin işləri yekunlaşıb, dağlıq ərazilərdə isə biçin sürətli mərhələdədir. Builki mövsüm rayonda aqroservislə yanaşı, hüquqi və fiziki şəxslərə məxsus 200 ə yaxın taxılbiçən kombayn sahələrə cəlb olunub.

Qeyd edək ki, ötən il cəlilabadlı taxılçılıar taxıl zəmilərindən ümumilikdə 174 min tona yaxın məhsul tədarük ediblər.