MƏDƏNİYYƏT
Reza Deqati: Qarabağ həqiqətlərini fotolarım və sərgilərim vasitəsilə bütün dünyaya çatdıracağam VİDEO
Şatovilən, 5 iyul, AZƏRTAC
Bu sərgi Fransada ən möhtəşəm sərgilərdəndir. İldə bir dəfə təşkil olunur və 2 ay davam edir. Burada dünyanın 22 ölkəsindən tanınmış incəsənət nümayəndələrinin əsərləri sərgilənir. İlk dəfədir ki, bu sərgidə fotolar nümayiş olunur. Bir neçə ildir Pyer Boncovanni məni bu sərgiyə dəvət edir. Builki sərgiyə dəvəti qəbul etdim. Bu sərgi çərçivəsində fotolarım əsasında 2 sərgi düzəldilib. Bu böyük zalda mənim fotoəsərlərim əsasında “Rezanın müasir Odisseyası” (l’Odyssee contemporaine de Reza) adlı sərgi, digəri isə “Sükutun ümmanı” (Epaisseur du silence) qalereyasını hazırlayıblar.
Bu fikirləri AZƏRTAC-a müsahibəsində məşhur fotoqraf-jurnalist Reza Deqati deyib.
Sərgiyə bir neçə fransız nazirin ziyarəti də gözlənilir. Böyük zalda Reza Deqatinin geniş formatda Azərbaycanla bağlı 6 fotosu nümayiş olunur. Ancaq Pyerin hazırladığı və hər birinə xüsusi mətn tərtib etdiyi Qarabağla bağlı fotolar digər zalda “Sükutun ümmanı” adlı xüsusi qalereyada nümayiş edilir. Şuşadan, Ağdamdan, digər azad olunmuş ərazilərimizdə erməni işğalı dövründə viranə qoyulmuş şəhərlərdən olan fotoları çox məşhur incəsənət komissarı Pyer özü seçib və onların tarixçəsi ilə bağlı yazılı mətnlər hazırlayıb.
“Qarabağla bağlı reallıqları belə sərgilər vasitəsilə dünyaya çatdıracağam. Ötən il oktyabr ayından beynəlxalq səviyyədə planlaşdırılmış layihələrimi ləğv etdim və Qarabağa getdim. Fransanın bir neçə şəhərində təşkil edilmiş builki sərgiləri ləğv etmədim. Fransada 12 gün olacağam və bu müddət ərzində 3 sərgim və 2 konfransım olub və 1 sərgi və konfrans qarşıdan gələn günlərdə olacaq. Bu tədbirlər zamanı məndən harada olduğumu, son aylar görünmədiyimi soruşurlar. Onda Qarabağdan danışır, orada olduğumu deyir və fotolarımı göstərirəm”, - deyə R.Deqati söyləyib.
Vurğulayıb ki, Qarabağın şəhər və kəndlərində törədilən vandalizm aktlarını, yaşayış məntəqələrinin viranə qoyulduğunu göstərməyə təzə başlayıb. Yenidən Azərbaycana qayıdacağını və bu ilin sonunadək orada olacağını deyən R.Deqati Qarabağı qarış-qarış gəzəcəyini, hər addımı fotolarında əbədiləşdirəcəyini diqqətə çatdırıb. “Azərbaycanda işlərimi qurtarandan sonra Qarabağa həsr edilmiş böyük fotokitab, xüsusi sərgi və konfrans təşkil edəcəyəm. Qarabağ həqiqətlərini əks etdirən fotolarımı, onlardan hazırladığım kitabı dünyanın böyük şəhərlərində də sərgiləyəcəyəm. Fotolarla bağlı xüsusi konfranslar təşkil edəcəyəm”.
Şəhla Ağalarova
AZƏRTAC-ın xüsusi müxbiri
Şatovilən