220 nömrəli məktəb-liseyin məzunu: Gələcəkdə özümü beyin cərrahı kimi görürəm
Bakı, 25 iyun, AZƏRTAC
Bu il ali təhsil müəssisələrinə qəbul imtahanlarında IV ixtisas qrupu üzrə ən yüksək nəticəni göstərən abituriyentlərdən biri də Bakı şəhəri 220 nömrəli məktəb-liseyin məzunu Ayan Xəqani qızı Hümbətova olub. O, qəbul imtahanında 400 bal toplayıb.
Ayan Hümbətova AZƏRTAC-a müsahibəsində bildirib ki, əldə etdiyi nəticə uzunmüddətli və planlı hazırlığın bəhrəsidir. Onun sözlərinə görə, qəbul imtahanlarına hazırlığa 9-cu sinifdən başlayıb. Sonra isə hazırlığını 10 və 11-ci siniflərdə davam etdirərək biliklərini daha da möhkəmləndirib.
Müsahibimizin sözlərinə görə, hazırlıq prosesində ən çox çətinlik çəkdiyi fənn biologiya olub: “Biologiya mənə digər fənlərlə müqayisədə daha çətin idi. Bu çətinliyi aradan qaldırmaq üçün daim təkrar edir, çoxlu test tapşırıqları işləyirdim. Müntəzəm çalışma nəticəsində həmin sahədə də istədiyim nəticəni əldə edə bildim”.
Ayan Hümbətovanın fikrincə, yüksək nəticə qazanmasında əsas rol oynayan amillər məsuliyyətli yanaşması, nizam-intizamı və qarşısına qoyduğu məqsədlərə sadiq qalması olub.
Gələcək planlarından danışan həmsöhbətimiz Azərbaycan Tibb Universitetinin müalicə işi ixtisasına qəbul olmaq istədiyini söyləyib.
“Gələcəkdə özümü beyin cərrahı kimi görürəm. İnsan sağlamlığının qorunmasına töhfə vermək və bu sahədə peşəkar olmaq ən böyük məqsədlərimdən biridir”, - deyə Ayan qeyd edib. O bildirib ki, əvvəlcə müəyyən müddət Azərbaycanda oxumağı, daha sonra isə beynəlxalq təcrübə qazanmaq məqsədilə təhsilini xaricdə davam etdirməyi planlaşdırır.
Abituriyent hazırlıq dövründə boş vaxtının çox olmadığını da diqqətə çatdırıb. O qeyd edib ki, asudə vaxtlarında əsasən istirahət etməyə, musiqi dinləməyə və sosial şəbəkələrə baxmağa üstünlük verib.
Məktəb illərində respublika fənn olimpiadalarında iştirak etdiyini bildirən müsahibimiz fizika və riyaziyyat üzrə final mərhələsinə qədər yüksəldiyini qeyd edib.
Yüksək nəticə əldə etmək istəyən abituriyentlərə tövsiyələrini verən Ayan Hümbətova deyib: “Müəllimlərin verdiyi tapşırıqları vaxtında yerinə yetirmək, davamlı çalışmaq və qarşıya qoyulan məqsəddən yayınmamaq uğura gedən yolda ən vacib amillərdəndir”.
Qeyd edək ki, buraxılış imtahanından 286,5 bal toplayan Ayanın ümumi nəticəsi 686,5 baldır.
Müxbir-Nərmin Murad
Bölmənin digər xəbərləri
