Neftçala, 8 iyul, İsmayıl Cəfərli, AZƏRTAC

Azərbaycanda pambıqçılığın inkişafına böyük diqqət göstərilir. Son illərdə kənd təsərrüfatı məhsulları istehsalçıları üçün tətbiq olunan güzəştlər pambıqçılığın inkişafını yeni mərhələyə yüksəldib, bu sahəyə investisiyaların cəlb olunmasına və pambıq istehsalına marağı artırıb. Respublikamızın bütün pambıqçılıq rayonlarında olduğu kimi, Neftçala da bu sahə diqqət mərkəzindədir.

AZƏRTAC xəbər verir ki, ötən il Neftçala rayonunda 6949 hektar sahədə pambıq əkini aparılmış, 23 min tondan çox “ağ qızıl” toplanmışdı. Bu il də fermerlərin gözləntiləri böyükdür. Artıq sahələri suvarma problemləri arxada qaldığından fermerlər pambığın bol olacağını söyləyirlər.

Pambıqçı Rəşid Həsənov deyir ki, son illər ölkəmizdə pambıqçılığın inkişafı üçün fermerlərə böyük dəstək verilir. “Keçən il 5 hektar sahədən 30 sentnerdən yuxarı məhsul götürmüşdük. Bu il də əkmişəm. Mənə elə gəlir ki, keçən ilə nisbətən bu il məhsuldarlıq daha çox olacaq. Su sarıdan da heç bir çətinliyimiz yoxdur”, - deyə o əlavə edib.

Hazırda pambıqçılar ziyanvericilərə qarşı mübarizə aparırlar. Mütəxəssislər də pambıq sahələrində ziyanvericilərə qarşı profilaktik tədbirlərin aparılmasını zəruri hesab edirlər.

Kənd təsərrüfatı mütəxəssisi Rafael Hüseynovla söhbət zamanı bildirib ki, pambıq sahələrində qızğın becərmə işləri aparılır. Belə ki, pambıq sahələri alaq otlarından təmizlənir, ziyanverici həşəratlara qarşı mübarizə tədbirləri görülür: “Hazırda ziyanvericilərdən kəpənəkqurdunun aktivləşmə vaxtıdır. Əgər yumurta qoyubsa, yaxud tırtıllar varsa, pambıq sahəsi tez zamanda herbisidlə dərmanlanmalıdır. Fermerlərə tövsiyəm odur ki, hər gün iki dəfə pambıq sahələrinə baxış keçirsinlər. Hazırda olduğumuz sahədə becərmə normal aparılarsa, 30-35 sentner məhsul götürmək mümkündür.”

Qeyd edək ki, bu il Neftçalada 8770,92 hektar sahədə pambıq əkini aparılıb. Rayonda 2028 istehsalçı 3 şirkətlə müqavilə bağlayıb. Bu il neftçalalı “ağ qızıl” ustaları pambığın əsasən “Flaş”, “ Bəyaz altun” və “Gəncə 182” sortlarını əkiblər.