Vaşinqtonda Müstəqilliyin Bərpası Günü və “Şuşa İli”nə həsr olunmuş rəsmi qəbul keçirilib VİDEO
Vaşinqton, 22 oktyabr, AZƏRTAC
Azərbaycan Respublikasının Amerika Birləşmiş Ştatlarındakı səfirliyi tərəfindən 18 Oktyabr - Müstəqilliyin Bərpası Günü və “Şuşa İli” münasibətilə Vaşinqtonda rəsmi qəbul və ziyafət təşkil olunub.
Qəbulda ABŞ-ın dövlət rəsmiləri, ictimai-siyasi xadimlər, Vaşinqtonda akkreditə olunmuş diplomatik nümayəndəliklərin rəhbərləri, hərbi attaşeləri və əməkdaşları, ABŞ-da fəaliyyət göstərən şirkət nümayəndələri, ali təhsil ocaqlarının nümayəndələri, həmçinin bu ölkədəki Azərbaycan icmasının üzvləri iştirak ediblər.
Tədbirdə əsas qonaq qismində ABŞ dövlət katibinin Avropa və Avrasiya məsələləri üzrə baş köməkçisi səfir Derek Hoqan, Oklahoma Milli Qvardiyasının ordu qərargah rəisi briqada generalı Con Harrison, Müdafiə Departamentinin Milli Qvardiya Bürosunun rəisinin müavini general-leytenant Mark Sassevil iştirak və çıxış ediblər.
Tədbirdə çıxış edən Azərbaycan Respublikasının Amerika Birləşmiş Ştatlarındakı səfiri Xəzər İbrahim ölkələrimiz arasında strateji tərəfdaşlığın və əməkdaşlığın müxtəlif istiqamətlərindən bəhs edib. Azərbaycanın müstəqilliyini bərpa etdiyi dövrdə ABŞ tərəfindən göstərilən dəstəyin önəmi vurğulanıb. Azərbaycan-ABŞ əməkdaşlığının daha da inkişaf edəcəyinə və güclənəcəyinə əminlik ifadə olunub. Eyni zamanda, tədbirlə eyni gündə Zəngilan Hava Limanının açılışında Azərbaycan və Türkiyə Prezidentlərinin birgə iştirakının regionda sülhə və inkişafa töhfə verəcəyinə inam ifadə olunub. Səfir, həmçinin Oklahoma ilə tərəfdaşlığın qurulmasının 20 illiyindən və bu tərəfdaşlığın əhəmiyyətindən bəhs edib.
Yüksəkvəzifəli ABŞ rəsmiləri Azərbaycanın Müstəqilliyinin Bərpası Günü münasibətilə təbriklərini çatdırıb, hazırda dünyada baş verən hadisələrin müstəqilliyin və sülhün nə qədər önəmli olduğu vurğulayıb, Azərbaycanla ABŞ arasında həyata keçirilən müdafiə və təhlükəsizlik, transmilli təhdidlərə qarşı mübarizə, sərhəd təhlükəsizliyi, enerji təhlükəsizliyi, terrorçuluqla mübarizə və s. mühüm istiqamətlərdə əməkdaşlığın daha da inkişaf etdirilməsində maraqlı olduqlarını vurğulayıblar. Həmçinin, növbəti 30 il ərzində əməkdaşlığı davam etdirməyə və bir sıra regional və qlobal məsələlər üzrə ABŞ-Azərbaycan tərəfdaşlığını dərinləşdirməyə ümid ifadə edilib. Bölgəmizdə sülh və əmin-amanlığın təmin edilməsində ölkələrimiz arasında strateji tərəfdaşlığın mühüm əhəmiyyət kəsb etdiyi diqqətə çatdırılıb. Eyni zamanda, cari ilin Azərbaycan Ordusu ilə Oklahoma Milli Qvardiyası arasında Ştatla Tərəfdaşlıq çərçivəsində əməkdaşlığının 20-ci ildönümünün qeyd olunduğu və bu illər ərzində qarşılıqlı şəkildə faydalı addımlar atıldığı vurğulanıb.
Tədbirin mədəni hissəsində məşhur caz pianoçusu Əminə Fiqarovanın rəhbərlik etdiyi qrup tərəfindən konsert proqramı təşkil olunub. İfaçının rəhbərliyində caz qrupu Vaqif Mustafazadənin və Əminə Fiqarovanın müəllifi olduğu əsərləri ifa edib.
Tədbirdə, həmçinin “Şuşa İli”nə həsr olunmuş fotosərgi təşkil olunub. Sərgidə Şuşanın işğaldan azad olunmasından sonra bərpa edilmiş tarixi memarlıq abidələri, o cümlədən Şuşa qalası, Xurşidbanu Natəvanın evi, Molla Pənah Vaqifin muzey-məqbərə kompleksi, Mehmandarovların evi, Bülbülün ev-muzeyi, Yuxarı və Aşağı Gövhər Ağa məscidləri, Xan qızı bulağı, eyni zamanda, şəhərin dron vasitəsilə çəkilmiş mənzərələri, Şuşanın simvolu olan Xarı bülbülün fotoları nümayiş etdirilib.
Tədbir zalında, həmçinin Qarabağ xalçaları, Azərbaycan musiqi alətlərindən və mədəniyyət nümunələrindən ibarət guşə yaradılıb, Azərbaycan mətbəxinə aid ləziz yeməklər, şirniyyatlar və içkilər qonaqlara təqdim edilib.
AZƏRTAC-ın Vaşinqton bürosu
Bölmənin digər xəbərləri
