Bakı, 24 may, AZƏRTAC

Azərbaycanın Estoniyadakı səfirliyinin təşkilatçılığı ilə Tallin şəhərində 28 May - Müstəqillik Günü münasibətilə tədbir keçirilib.

Səfirlikdən AZƏRTAC-a bildiriblər ki, tədbirdə Estoniya parlamentinin (Riigikogu) sədr müavini Yuri Ratas, Estoniya-Azərbaycan parlamentlərarası dostluq qrupunun sədri Riina Solman və qrupun üzvləri, Estoniyada akkreditə olunan diplomatik korpusun, Estoniyadakı Azərbaycan icmasının, həmçinin yerli ictimaiyyətin təmsilçiləri iştirak ediblər.

Təntənəli mərasimdə əvvəlcə Estoniyanın və Azərbaycanın Dövlət himnləri səsləndirilib.

Səfir Anar Məhərrəmov tədbiri giriş sözü ilə açaraq 1918-ci il mayın 28-də Azərbaycan Xalq Cümhuriyyətinin Milli Şurası tərəfindən İstiqlal Bəyannaməsi imzalanmaqla Azərbaycanın müstəqilliyini dünyaya bəyan olunduğunu qeyd edib, bu hadisənin Azərbaycan dövlətçiliyi tarixində şanlı səhifə olduğunu vurğulayıb. Qeyd olunub ki, Azərbaycan Xalq Cümhuriyyətinin mövcud olduğu 23 aylıq qısa müddət ərzində bir çox mühüm nailiyyətlərə imza atılıb, Azərbaycanın ilk parlamenti və hökuməti yaradılıb, dövlət atributları təsis olunub, dövlət sərhədləri müəyyənləşdirilib.

Diplomat ölkəmizin 1991-ci ildə müstəqilliyini bərpa etdiyini, bununla belə, müstəqilliyin ilk illərində bir çox çətinliklərlə üzləşdiyini qeyd edib. Məhz xalqın təkidli tələbi ilə hakimiyyətə qayıdan Ümummilli Lider Heydər Əliyevin uzaqgörənliyi və müdrik siyasəti sayəsində Azərbaycanın dayanıqlı inkişafının təmin olunduğu vurğulanıb.

Diqqətə çatdırılıb ki, əsası Ümummilli Lider Heydər Əliyev tərəfindən qoyulan siyasətin bu gün Prezident İlham Əliyev tərəfindən uğurla davam etdirilir, ölkəmizin hərtərəfli inkişafı istiqamətində böyük nailiyyətlər əldə olunub.

Səfir Azərbaycanın təşəbbüsü ilə nəhəng enerji layihələrinin uğurla həyata keçirildiyini, beynəlxalq nəqliyyat dəhlizlərinin yaradılması istiqamətində ardıcıl addımların atıldığını qeyd edib. Diplomat Azərbaycanın işğaldan azad edilmiş ərazilərinin qısa müddətdə regionun ən inkişaf etmiş bölgəsinə çevrilməsi istiqamətində həyata keçirdiyi genişmiqyaslı işlərdən də söz açıb.

Estoniya-Azərbaycan əlaqələrindən söz açan səfir ölkələrimiz arasında əlaqələrin həm siyasi, həm iqtisadi və humanitar sahədə yüksələn xətt üzrə inkişaf etdiyini diqqətə çatdırıb.

Estoniya Hökuməti adından çıxış edən Estoniya-Azərbaycan parlamentlərarası dostluq qrupunun sədri xanım Riina Solman Müstəqillik Günü münasibətilə xalqımızı təbrik edərək, ölkələrimiz arasında bütün sahələrdə əlaqələrin uğurla inkişaf etdiyini bildirib. R.Solman əlaqələrin inkişafında parlamentlərarası münasibətlərin rolunu xüsusi vurğulayıb.

Tədbir Azərbaycan rəqslərinin ifası ilə davam edib.

Xüsusi guşədə Azərbaycan istehsalı olan məhsulların nümayişi, həmçinin ölkəmizin tarixini və füsunkar təbiətini əks etdirən rəsm əsərləri tədbir iştirakçılarının böyük marağına səbəb olub.

Sonda tədbir iştirakçılarına milli mətbəximizin ləziz təamları təqdim edilib.