Yeni magistral avtomobil yolunun tikintisi yekunlaşmaq üzrədir VİDEO
Bakı, 7 iyul, AZƏRTAC
Prezident İlham Əliyevin imzaladığı sərəncamlara əsasən, Azərbaycan Avtomobil Yolları Dövlət Agentliyi tərəfindən “Şimal-Cənub” beynəlxalq nəqliyyat dəhlizinin tərkib hissəsi olan Bakı-Quba-Rusiya Federasiyası ilə dövlət sərhədi yeni avtomobil yolunun “Yaşma bağları” yaşayış məntəqəsindən başlayaraq tikintisi sürətlə və keyfiyyətlə davam etdirilir.
Agentliyinin İctimaiyyətlə əlaqələr şöbəsindən AZƏRTAC-a bildirilib ki, magistral yol layihəsinin tikintisi 5 hissə üzrə həyata keçirilir.
Məlumata əsasən, magistralın Xızı rayonunun Yaşma və Giləzi qəsəbələri arasında yerləşən 30 kilometrlik 1-ci hissəsi üzrə (layihə üzrə 0-29.9 kilometr) tikinti işləri sona çatdırılıb. Layihə üzrə körpü və yol ötürücüsü, yolaltı keçid, müxtəlif ölçüdə suötürücü borunun, yolun ayırıcı zolağında beton baryerlərin tikintisi, həmçinin ödəmə məntəqələrinin və yol avadanlıqlarının quraşdırılması üzrə işlər başa çatdırılıb.
Yeni magistral yolda aparılan işlər çərçivəsində 23.5 kilometrlik 2-ci (layihə üzrə 29.9-53.5 kilometr) və 20 kilometrlik 3-cü (layihə üzrə 53.5-73.5 kilometr) hissələr üzrə torpaq yatağının tikintisi, süni qurğularda, körpülərdə və yol qovşaqlarında tikinti-quraşdırma, yol geyiminin əsas laylarının tikintisi işləri yerinə yetirilib. Yolun 29.9-60 kilometr hissəsində hər iki istiqamət üzrə asfalt-beton örtüyünün döşənməsi işləri də yekunlaşıb. Həmçinin 60-73.5 kilometr hissəsində isə yol əsasının, süni qurğuların və körpü keçidlərinin tikintisi işləri başa çatıb, aşınma qatı istisna olmaqla asfalt-beton işləri tamamlanıb.
Magistralın 18.5 kilometrlik 4-cü (layihə üzrə 73.5-92 km) hissəsi üzrə tikinti işləri davam etdirilir. Hazırda həmin hissədə yol əsasının, yol ötürücü və drenaj boruların, körpülərin tikintisi işləri başa çatıb, aşınma qatı istisna olmaqla asfalt beton örtüyündə son tamamlanma işləri həyata keçirilir.
Yeni magistralın 58 kilometrlik 5-ci (layihə üzrə 92-150 kilometr) hissəsi üzrə tikinti işləri tam olaraq yekunlaşdırılıb. Bu hissədə suötürücü və drenaj qurğular, alt və ehtiyat keçidləri, yol geyimi tikintisi, yol avadanlıqları və mühafizə çəpərlərinin quraşdırılması, nişanlama və işıqlandırma işləri tamamlanıb.
Yeni inşa edilən 150 kilometrlik magistralda yolboyu 55 yol ötürücüsü və körpü, 44 yolaltı keçid və 509 müxtəlif diametrlərdə dairəvi və düzbucaqlı suötürücü borular inşa edilib. Bununla da H.Z.Tağıyev qəsəbəsindən başlayaraq Rusiya Federasiyası ilə dövlət sərhədinə qədər uzanacaq yeni avtomobil yolunun ümumi uzunluğu 150 kilometr, eləcə də Bakı şəhərindən Samur sərhəd-keçid məntəqəsinə olan məsafə 195 kilometr təşkil edir, bu da mövcud yolun 13 kilometr azalması ilə nəticələnir.
Ümumilikdə, layihə üzrə 6 ödəmə məntəqələri və nəqliyyat vasitələrinin dayanması üçün dayanacaq meydançaları tikilməkdədir.
Layihədə hər hansı maneənin avtomobil yoluna çıxmasının qarşısını almaq, nəqliyyat vasitələrinin təhlükəsiz hərəkətinin təmin olunması məqsədilə körpü və birləşmələrin, alt keçid, suötürücü boruların, işıqlandırma işlərinin, ayırıcı zolaqda beton çəpərlərin, ekoloji və ətraf mühitin qorunması tədbirləri yol boyu icra edilir.
Cari ildə tikintisinin yekunlaşdırılması planlaşdırılan yeni magistral avtomobil yolu nəqliyyat xidmətlərini daha da yaxşılaşdırmaqla yanaşı, bölgədə turizmin inkişafına əlavə təkan verəcək, nəqliyyat infrastrukturunun inkişafına, yeni iş yerlərinin açılmasına şərait yaradacaq.
Bölmənin digər xəbərləri
