Xaçmaz, 8 sentyabr, Elxan Yusifli, AZƏRTAC

Buraxılış və ali məktəblərə qəbul imtahanlarının nəticələrinə əsasən, Xaçmaz rayonu üzrə ən yüksək bal toplayan Aysel İbrahimova riyaziyyat müəllimi olacaq.

AZƏRTAC-ın bölgə müxbiri xəbər verir ki, imtahanlarda 648,2 bal nəticə əldə edən Aysel Bakı Dövlət Universitetinin Riyaziyyat müəllimliyi (tədris ingilis dilində) ixtisasına qəbul olub.

Aysel Ramiz qızı İbrahimova Xaçmaz şəhəri Cəfər Cabbarlı adına 6 nömrəli tam orta məktəbin məzunudur. O, məktəbi fərqlənmə attestatı ilə bitirib. Buraxılış və ali məktəblərə qəbul imtahanlarının nəticələrinə əsasən rayonda birinci, region üzrə ikinci ən yüksək bal toplayan məzundur.

“Bu il keçirilən buraxılış imtahanlarında 266,7, qəbul imtahanında isə 381,5 bal topladım. Bu göstərici ilə də arzusunda olduğum riyaziyyat müəllimliyi ixtisasına qəbul olundum. Toladığım bal məlum olandan sonra ixtisas seçimində birinci müəllimliyi göstərmişdim. Sinif yoldaşlarım, qohumlar hətta bəzi müəllimlərim söylədilər ki, bu balla daha iddialı ixtisaslar seçə bilərdin. Amma müəllimlik mənim uşaqlıq arzum olub. Riyaziyyat müəllimi olacağıma isə artıq yuxarı siniflərdə oxuyanda qərar vermişəm. Uşaqlarla vaxt keçirməyi sevirəm. Bu da müəllimliyi seçməyimdə rol oynayıb”, - deyə Aysel İbrahimova söyləyib.

Aysel deyir ki, ali məktəbə hazırlaşarkən gününün 10-12 saatını dərs oxumaqla keçirib. Amma əlavə məşğuliyyətlərindən də kənar qalmayıb. Hobbisi kitab oxumaqdır. Bundan əlavə, film izləməyi və pianinoda ifa etməyi də çox xoşlayır: “Müasir dövrdə ətrafımızda bizi özünə cəlb edən çoxlu maraqlı əyləncələr, məşğuliyyətlər var. Amma qarşımıza qoyduğumuz məqsədə çatmaq üçün fədakarlıq etməliyik. Bakı Dövlət Universitetinin qapısından içəri girəcəyim günü səbirsizliklə gözləyirəm. Artıq sayılı günlər qalıb. Bu, sevincli və qürurverici bir hissdir”.

Ayselin təhsil aldığı Xaçmaz şəhəri Cəfər Cabbarlı adına 6 nömrəli tam orta məktəbin 60 nəfərdən çox məzunu tələbə adını qazanıb.

“Bizim məktəb rayondakı ən böyük təhsil ocaqlarındandır. Bu il artıq 55 nəfərin Azərbaycanın ali məktəblərinə qəbul olunduğu müəyyənləşib. Bundan başqa, 8 məzunumuz Türkiyə və digər xarici ölkələrin ali məktəblərinə qəbul olub. Məzunlarımız arasında ən yüksək nəticə qazanan Ayseldir. Çox sevinirik ki, Aysel ölkəmizin sayılıb-seçilən universitetlərindən birinə qəbul olub. Həm də onun müəllim ixtisasına yiyələnməsi bizi ikiqat qürurlandırır”, - deyə məktəbin direktor müavini Namik Müzəffərov bildirib.

Buraxılış və ali məktəblərə qəbul imtahanlarının nəticələrinə əsasən Quba-Xaçmaz Regional Təhsil İdarəsinin əhatə etdiyi rayonlar üzrə 29 məzun 600 baldan yuxarı nəticə qazanıb. Tələbə adını qazanan həmin məzunların 11-i Quba, 8-i Siyəzən, 5-i Xaçmaz, 5-i Şabran məktəblərində təhsil alıb. Qusarlı iki məzun isə 599 bal toplayıb.