Qazaxda gül kələmi əkən fermerlər alıcı tapa bilmirlər – REPORTAJ VİDEO
Qazax, 23 noyabr, Ruslan Novruzoğlu, AZƏRTAC
Qazaxda bir müddətdir ki, gül kələminin yığımına başlanılıb. Fermerlər məhsulu yığımın ilk dövründə yaxşı qiymətə satsalar da, indi alıcı tapa bilmirlər. Az sayda olan alıcı isə məhsulu 35-40 qəpikdən alır. Fermerlər məhsulu aşağı qiymətə də olsa, satmaq fikrindədirlər, ancaq alıcı azdır.
AZƏRTAC xəbər verir ki, hektarlarla sahədə gül kələmi əkən fermerlər alıcı və soyuducu anbar olmadığına görə məhsulu yığa bilmirlər. Kələm isə tez xarab olan məhsuldur deyə, fermerlər əziyyətlərinin hədər gedəcəyini deyirlər.
Gül kələmi bir neçə aya ərsəyə gəlir. Belə ki, fevral ayında xaricdən alınan toxumu istixana şəraitində yetişdirib, tingləri mart ayında açıq hava şəraitində becərirlər. Bundan sonra isə aqrotexniki qulluq göstərilir, dərmanlanır və bir neçə aya yığılır. Fermerlər düzgün aqrotexniki qulluq göstərildikdə hətta bir hektardan 40 tona qədər məhsul toplamağın mümkün olduğunu söyləyirlər.
Fermer Elmar Musayev kələmin bir neçə növünü becərir. O, 15 hektar sahədə becərdiyi gül kələminin zay olacağından narahatdır. Onun kimi bir neçə fermer də eyni aqibəti yaşayır. “Orqanizm üçün faydalı olan gül kələmi bir neçə xəstəlik, o cümlədən mədə-bağırsaq üçün xeyirlidir. Hazırda sata bilmirik. Amma çox gözəl məhsuldur. Azərbaycanda ən böyük gül kələmi sahəsi əkib-becərən fermer demək olar ki, mənəm. Mən də bu il məhsulumu sata bilmədim”, - deyə Elmar Musayev bildirib.
Gül kələmi becərən digər fermer Mirzəli Səmədov isə deyir ki, ölkədə bu bitki əvvəllər geniş sahələrdə əkilməyib. Bir neçə ildir ki, gül kələmi belə geniş sahələrdə əkilir: “Gül kələminin əkini üzrə az-çox ixtisaslaşmışıq. Bu kələm A, B, C və D vitaminləri ilə zəngindir. İnsan üçün faydası həddindən artıq çoxdur. İnsanlarımız bu tərəvəzi yaxşı tanımır deyə, alışı da zəifdir. Rayonda soyuducu anbar olsaydı, məhsulumuzu yığıb orada saxlayardıq ki, zay olmasın. Biz də həvəslə əkib-becərərdik”.
Fermerlərin sözlərinə görə, əvvəl 3-4 manata satışı həyata keçirilsə də, indi məhsulun alıcısı yoxdur və 35-40 qəpiyədir. Bir hektara 25 ton məhsul verən gül kələminin hər hektarından normal satış olduqda, 30 min manata qədər gəlir əldə etmək olur.
Qazaxda bu il ağbaş kələm, gül və qırmızı kələm növü olmaqla, ümumilikdə, 60 hektar sahədə kələm əkilib. Qazax Dövlət Aqrar İnkişaf Mərkəzindən bildirilib ki, rayonda soyuducu anbar tikintisi ilə bağlı müraciət olunub. Həmçinin fermerlər subsidiyanın artırılması barədə də təkliflə çıxış ediblər və bu məsələ də aidiyyəti qurumlar qarşısında qaldırılıb. “Fermerlərimiz 5 ilə yaxındır ki, gül kələmi növünün əkini ilə məşğuldurlar. Yeni əkin növü olduğuna, bu kələmi alıcılar hələ yaxşı tanımadığına görə satışında müəyyən problemlər yaşanır. İstərdik ki, rayonumuzda konserv zavodları və soyuducu anbarlar tikilsin ki, fermerlər də məhsullarını ucuz qiymətə satmaq problemi ilə qarşılaşmasınlar”, - deyə Qazax DAİM-nin bitkiçilik sektorunun müdiri Barat Vəliyev əlavə edib.
Gül kələmi qulluq və zəhmət tələb edən tərəvəz növü olmaqla, orqanizm üçün də olduqca faydalıdır. Gül kələmi maddələr mübadiləsini yaxşılaşdırır, immun, həzm və ürək-damar sisteminin işini normallaşdırır, əsəbləri möhkəmləndirir.
Bölmənin digər xəbərləri
