28 May - milli kimliyimizin və azadlıq sevgimizin bəyanı günüdür
Bakı, 27 may, AZƏRTAC
Xalqların və millətlərin tarixində elə günlər olur ki, həmin günlər təkcə tarix olaraq keçmişin yaddaşı kimi qalmır, həm də gələcəyə yön verən mənəvi mayak rolunu oynayır. Azərbaycan xalqı üçün belə günlərdən biri təqvimin 28 May tarixidir.
28 May sıradan bir gün deyil. Bu, milli kimliyimizin, azadlıq sevgimizin bəyanı günüdür. 1918-ci ilin bu günündə - mayın 28-də Azərbaycan xalqı özünün azadlıq istəyinə nail olmağı bacardı. Bir qrup mütərəqqi ruhlu aydınlarımızın rəhbərliyi ilə Azərbaycan Xalq Cümhuriyyəti (AXC) istiqlaliyyətimizi elan etməklə xalqımızı tarixi haqqı olan azadlığına qovuşdurdu. Şərqin ilk demokratik, hüquqi və dünyəvi parlament respublikası kimi tarixə həkk olunan AXC 1918-ci il mayın 28-də İstiqlal Bəyannaməsini imzalamaqla təkcə müstəqilliyimizi dünyaya bəyan etmədi, eyni zamanda çoxəsrlik dövlətçilik ənənələrimizi qorudu və xalqımızın azadlıq ideyalarını reallaşdırdı. Amma təəssüf ki, bolşevik Rusiyası tərəfindən azadlığımız süngü ilə əlimizdən alınaraq ölkəmiz işğal olundu, milli məfkurə daşıyıcılarımıza qarşı repressiya dalğası başlandı. İmperiya mənsubları AXC-ni süquta uğratsalar belə, bütün basqıların, qadağaların fonunda kom¬munist epoxası illərində azadlıq, müstəqillik arzularımızı bizə unutdura bilmədi, bu sevgini qəlbimizdə yaşatdıq və tarixi məqamı gözlədik.
AZƏRTAC xəbər verir ki, bu fikirlər Naxçıvan MR Ali Məclisinin deputatı Xumar Məmmədovanın açıqlamasında yer alıb.
Onun sözlərinə görə, ötən əsrin sonlarında Azərbaycan övladlarının qanı hesabına yenidən tarixi müstəqilliyinə qovuşdu. Sovet imperiyasının çöküşündən sonra Azərbaycan dövlət müstəqilliyini bər¬pa etdi. Lakin azadlığımızın sevincini yaşamamış, yenidən onu itirmək təhlükəsi ilə üzləşdik. Belə ki, 1993-cü ilin iyun ayında ölkəmizdə mövcud olan siyasi vəziyyət onu bir daha sübut etdi ki, müstəqilliyimizin sütunları etibarlı əllərdə deyil. İdarəçilik təcrübəsi olmayanların ölkə rəhbərliyində təmsil olunması, yanlış daxili və xarici siyasət, qanunların işləməməsi özbaşınalığın artması ilə nəticələnmiş, sabitliyin pozulması mənfur düşmənin işinə yaradı və torpaqlarımızın işğalına səbəb oldu. Xarici və daxili düşmənlərinin pozucu poliqonuna çevrilmiş Azərbaycan vətəndaş müharibəsinin bir addımlığında və ölkədə yaranmış siyasi, hərbi böhran müstəqilliyimizə ciddi təhdid idi. Xalq çarəsiz bir durumda anlayırdı ki, ölkəni düşdüyü bu bəlalardan yalnız Ümummilli Lider Heydər Əliyev xilas edə bilər. 1993-cü ildə Ulu Öndər Heydər Əliyev xalqın tələb və təkidi ilə yenidən siyasi hakimiyyətə qayıtdı. İlk dəfə olaraq üçrəngli bayrağımızı Naxçıvan Muxtar Respublikasının Ali Məclisinin sessiyasında rəsmi dövlət bayrağı kimi qaldıran, Vətənə, xalqa sədaqətini əməli işi ilə sübut edən
Ümummilli Lider Heydər Əliyev yenidən siyasi hakimiyyətə gəlməklə təkcə müstəqilliyimizi qorumadı, eyni zamanda inkişaf və tərəqqimizin fundamental əsaslarını yaratdı. Daxili və xarici düşmənlərimizə yerini göstərən böyük Heydər Əliyev Azərbaycan dövlətçiliyinin qorunması üçün qətiyyətli tədbirlər görməklə birinci növbədə ölkədə ictimai-siyasi sabitliyi bərqərar etdi, xalqın arzuladığı müstəqil dövləti qurmağı bacardı və ölkəni sürətli inkişaf yoluna çıxardı.
Azadlıq və istiqlaliyyəti hər bir xalqın milli sərvəti hesab edən Ulu öndər haqlı olaraq qeyd edirdi ki, müstəqilliyin əldə olunması nə qədər çətindirsə, onun saxlanılması, daimi, əbədi olması bundan da çətindir. Bütün bunların fonunda Ümummilli Lider ən çətin,
ən mürəkkəb illərdə böyük Atatürkün tarixi qələbəsini özünəməxsus qətiyyət və cəsarətlə təkrarlayaraq müstəqil Azərbaycan dövlətini qorumaqla dahiliyini, böyüklüyünü bir daha nümayiş etdirdi. Bu gün bütövləşən, qüdrətli, müstəqil Azərbaycan ona görə mövcuddur ki, xalqımızın Heydər Əliyev kimi övladı olub.
Beləliklə, əsrin əvvəllərində xaincəsinə endirilən, əsrin sonlarında yenidən endirilmək təhlükəsinin bir addımlığında olan mübarək bayrağımızı Ulu Öndər layiq olduğu zirvəyə qaldıraraq bizə azad dövlət, Vətən miras qoydu, müstəqilliyimizin qorunmasını, möhkəmləndirilməsini ən etibarlı davamçısına həvalə etdi.
Bildirib ki, Prezident İlham Əliyevin liderliyi ilə ölkəmizdə milli dövlətçilik ənənələrinin yeni səhifəsi başlandı. Dövlət başçımızın rəhbərliyi ilə Azərbaycanda müasir çağırışlar fonunda demokratik, hüquqi, dünyəvi dövlət, vətəndaş cəmiyyəti quruculuğu prosesi uğurla davam etdirildi. AXC-yə, onun qurucularına dərin hörmət və ehtiram göstərən dövlət başçısının təşəbbüsü ilə Azərbaycan Xalq Cümhuriyyətinin şərəfinə İstiqlal Bəyannaməsi abidəsi ucaldıldı. Prezident İlham Əliyev tərəfindən 2018-ci ilin ölkəmizdə “Azərbaycan Xalq Cümhuriyyəti İli” elan edilməsi, “Azərbaycan Xalq Cümhuriyyətinin 100 illiyi (1918-2018)” yubiley medalı”nın təsis olunması və görülən digər işlər dövlətçilik ənənələrimizə göstərilən böyük dəyərin bariz nümunəsidir.
“Ötən əsrin əvvəlləri azadlığımızın dünyaya bəyanı ilə yaddaşlarda qaldısa, təxminən bir əsr sonra milli maraqlarımızı tam təmin edən Prezident İlham Əliyev Ali Baş Komandan kimi ərazi bütövlüyümüzü bərqərar edərək fövqəlqəhrəmanlığını nümayiş etdirdi, bizi qlobal arenada mübariz, döyüşkən və müzəffər xalq kimi tanıtdı. Bölgədə əsrlərlə davam edən erməni separatizminin kökünü kəsərək bütün sərhədlər boyunca Azərbaycan bayrağının dalğalanmasını təmin etdi.
Dünya bir daha əmin oldu ki, Prezident İlham Əliyevin lideri olduğu Azərbaycanın müstəqilliyi əbədidir, dönməzdir, sarsılmazdır. Bu gün üçrəngli bayrağın heç zaman enməyəcəyi qətidir və heç bir qüvvə qüdrətli Azərbaycanı yolundan, azadlığından döndərə bilməz!”, - deyə deputat qeyd edib.
Bölmənin digər xəbərləri
