31 mart hadisələri ermənilərin azərbaycanlılara qarşı törətdikləri dəhşətli cinayətdir
Bakı, 31 mart (AZƏRTAC). Qaradağ rayonunda 31 mart- Azərbaycanlıların Soyqırımı Günü ilə bağlı anma mərasimi keçirilmişdir.
Tədbir iştirakçıları əvvəlcə Sahil qəsəbəsində azərbaycanlıların soyqırımı ilə bağlı abidə kompleksinin önünə əklil və gül dəstələri qoymuş, erməni daşnaklarının bolşeviklərlə birgə azərbaycanlılara qarşı həyata keçirdikləri soyqırımı qurbanlarını yad etmişlər.
Mərasimdə Qaradağ Rayon İcra Hakimiyyətinin başçısı Süleyman Mikayılov, İcra Hakimiyyəti başçısı yanında Şuranın üzvləri və rayon ictimaiyyətinin nümayəndələri iştirak etmişlər.
1918-ci il martın 30-dan aprelin 2-dək davam edən kütləvi qırğınlarda Stepan Şaumyanın rəhbərlik etdiyi erməni bolşevik dəstələri Bakıda minlərlə insanı qətlə yetirmiş, müsəlman ziyarətgahlarını yandırmışlar. Kütləvi qırğınlar zamanı şəhərin ən möhtəşəm məscidi sayılan Təzəpir məscidi aramsız top atəşinə tutulmuşdur. Ermənilər Bakının ən möhtəşəm memarlıq incilərindən olan İsmailiyyə binasını yandırmışlar. 31 mart hadisələri ermənilərin azərbaycanlılara qarşı törətdikləri dəhşətli cinayətdir.
Azərbaycanlılara qarşı həyata keçirilən soyqırımı siyasəti təkcə Bakı şəhəri ilə məhdudlaşmamışdır. 1918-ci ilin mart-aprel aylarında Bakıda, Şamaxıda, Qubada, Muğanda və Lənkəranda ermənilər 50 min azərbaycanlını qətlə yetirmiş, evlər qarət edilmiş, on minlərlə şəxs evlərindən qovulmuşdur. Təkcə Bakıda 30 min nəfər xüsusi qəddarlıqla qətlə yetirilmişdir. Şamaxıda 58 kənd dağıdılmış, 7 min nəfər öldürülmüşdür. Onlardan 1653-ü qadın, 965-i uşaq olmuşdur. Qubada 122, Qaradağda 150, Zəngəzurda 115 kənd yerlə-yeksan edilmiş, cinsindən və yaşından asılı olmayaraq əhaliyə divan tutulmuşdur. İrəvan quberniyasında 211, Qarsda isə 92 Azərbaycan kəndi dağıdılmışdır. İrəvan azərbaycanlılarının çoxsaylı müraciətlərindən birində göstərilmişdir ki, qısa zamanda bu şəhərdə və onun ətrafında 88 kənd dağıdılmış, 1920 ev yandırılmış, 131 min 970 nəfər öldürülmüşdür.
1918-ci ilin mart hadisələrinə ilk dəfə məhz ulu öndər Heydər Əliyev tərəfindən hüquqi-siyasi qiymət verilmişdir. Ümummilli Lider 1998-ci il martın 26-da bu soyqırımı ilə bağlı Fərman imzalamışdır. Bu Fərman XX əsrdə azərbaycanlılara qarşı törədilmiş soyqırımı barədə müasir və gələcək nəsillərdə möhkəm milli yaddaşın formalaşdırılması, dünyada bu hadisələrə düzgün siyasi və hüquqi qiymət verilməsi, belə halların qarşısının alınması və bir daha təkrarlanmaması üçün proqram mahiyyətli sənəd olmuşdur.
Bölmənin digər xəbərləri
